რუსეთში გასამგზავრებელი ქართული დელეგაციას სავიზო პრობლემები მოეხსნა. როგორც დღეს სოფლის მეურნეობის სამინისტროში ღვინის ეროვნული სააგენტოს თავმჯდომარემ ლევან დავითაშვილმა განაცხადა, დღეისათვის ვიზების საკითხი გადაწყვეტილია და შვეიცარიის საელჩოს რუსეთის სექციაში ქართული დელეგაციისათვის ვიზები გამზადებულია.
„აქედან გამომდინარე ლოჯისტიკური მხარეები უკვე მოგვარებულია. აღარ არსებობს დაბრკოლება და ჩვენ უკვე მზად ვართ შეხვედრისთვის შემდეგ კვირაში რუსეთის სანიტარულ სამსახურში"- განმარტავს ლევან დავითაშვილი.
მისივე ინფორმაციით, რუსეთში ქართული დელეგაცია შეხვდება რუსეთის მთავარ სანიტარს, „როსპოტრებნადზორის" ხელმძღვანელს გენადი ონიშენკოს.
ქართული დელეგაცია 7 წევრისაგან შედგება, საიდანაც ორი ღვინის ეროვნული სააგენტოს წარმომადგენელი 2 წარმომადგენელიც ასევე სურსათის ეროვნული სააგენტოდან იქნება. ქართულ დელეგაციაში შევლენ ასევე, ღვინის დარგის ასოციაციის წარმომადგენლებიც, უფრო კონკრეტულად ესენი არიან ასოციაციის აღმასრულებელი დირექტორი და გამგეობის თავმჯდომარე. დელეგაციაში შევა ასევე ხილისა და ბოსტნეული ექსპორტის კომპანიის ხელმძღვანელი.
„ჩვენ ვსაუბრობთ რუსეთში ფიტოსანიტარულ კონტროლს დაქვემდებარებული პროდუქციის დაბრუნებაზე. ანუ ეს არის საკვები და სასმელი პროდუქტები, რომელიც დღეს რუსეთის ბაზარზე არ შედის, თუ შევხედავთ ინდუსტრიულ პროდუქტებს, მასზე შეზღუდუბა არ არის. საქართველოდან რუსეთში როგორც იცით ხორციელდება ელეტროენერგიის ექსპორტი და ასე შემდეგ. ახლა საუბარია სასურსათო პროდუქტების დაბრუნებაზე, რომელიც რუსული მხარის მხრიდან ხარისხის კუთხით გარკვეულ კითხვებს ბადებდა და ჩვენ დარწმუნებულნი ვართ, რომ ხარისხის პრობლემა აღარ იქნება. ჩვენი დიალოგი ხარისხის კონტროლის სისტემებზე საუბარს შეეხება, რომ ქართული პროდუქტი რუსულ სტანდარტებთან შესაბამისოაბაში და ის ღირსია რუსულ ბაზარზე დაბრუნდეს"- განმარტავს ლევან დავითაშვილი.
შეხვედრები რამდენიმე რაუნდად გაიმართება და დაახლოებით 3 დღე გასტანს. გამორიცხული არ არის, რომ შემდგომში რუსული დელეგაციაც ეწვიოს საქართველოს.
შეგახსენებთ, რომ ქართული დელეგაცია მოსკოვში მოლაპარაკებების საწარმოებლად 3 თებერვალს გაემგზავრება, ხოლო 4 თებერვლიდან კი ოფიციალური შეხვედრებს დაიწყებენ.
