შიდა ქართლის ყოფილი გუბერნატორი სამშობლოში დაბრუნებას და სამართლებრივ ბრძოლას აპირებს. როგორც მიხეილ ქარელის განცხადებაშია აღნიშნული ის ყველაფერს გააკეთებს იმისათვის, რომ საკუთარი უდანაშაულობა დაამტკიცოს.
"მე დღეს ბედნიერი ვარ, რომ ყველასთან ერთად, სამშობლოში მეც მეძლევა ცხოვრების შესაძლებლობა , დავუბრუნდები წლების უნახავ ოჯახს, მშობლებს, მეგობრებს და იმ ადამიანებს რომლის გარეშე ცხოვრება ადამიანისთვის აუტანელია . ვაპირებ უახლოეს მომავალში დავბრუნდე სამშობლოში და თავისუფალ მართლმსაჯულების პირობებში სასამართლოს დავუმტკიცო ჩემი უდანაშაულობა და ღირსეულად გავიარო ეს არც თუ სასიამოვნო პროცედურები. დღევანდელი ვითარება საქართველოში მნიშვნელოვნად დადებით ატმოსფეროს ქმნის და შესაბამისად, ეს განცდა 1-ლი ოქტომბრის არჩევნების შედეგად დაბრუნებული სამართლიანობის, ღირსების, ურთიერთპატივისცემისა და პატრიოტიზმის შედეგია, რომელიც სააკაშვილის, ოქრუაშვილის, ადეიშვილის, მერაბიშვილის, ახალაიების და სხვათა მსგავსთა მიერ შექმნილი რეჟიმით იქნა სრულიად იგნორირებული, რეჟიმისა, რომელმაც არაერთი უბედურება მოუტანა ქვეყანას, მთლიანად ერს და ცალკეულად აღებულ უამრავ ადამიანს, რომელთა ცხოვრებაც ერთ წამში ჯოჯოხეთად იქცეოდა"- ნათქვამია ქარელის განცხადებაში.
ყოფილი გუბერნატორის ბიძინა ივანიშვილს მადლობასაც უხდის.
"უდიდესი მადლიერება მინდა გამოვხატო ყველა იმ ადამიანის მიმართ, ვინც მცირე დროში უზარმაზარი შრომა გასწია სამართლიანობის აღსადგენად და უამრავ ადამიანს თავისუფლება მიანიჭა; მადლობას ვუხდი ყველა იმ პარლამენტარს ვინც მხარი დაუჭირა ამ კანონპროექტს, განსაკუთრებით ადამიანის უფლებათა დაცვის კომიტეტს, მადლობას ვუხდი ასევე საქართველოს მთავრობას, უფლებადამცველ ორგანიზაციებს და ყველა იმ ჟურნალისტს, რომლებიც მუდმივად ინტერესდებოდნენ ამ თემით და არ აძლევდნენ სააკაშვილის მთავრობას პოლიტდევნილების და პოლიტპატიმრების თემის მიჩუმათებას", - აცხადებს ქარელი.