საქართველოს საგარეო საქმეთა მინისტრის მოადგილის ნინო კალანდაძის განცხადებით, ხელისუფლების მთავარი მიზანია საერთაშორისო დოკუმენტებში ტერმინები "ოკუპაცია" და "ეთნოწმენდა" დაფიქსირდეს.
"ჩვენი მთავარი მიზანია საერთაშორისო საზოგადოებაში, საერთაშორისო ტრიბუნებზე გაჟღერდეს და დოკუმენტებში დაფიქსირდეს ტერმინები "ოკუპაცია" და "ეთნოწმენდა". ამ საკითხზე ევროპის საბჭოს საპარლამენტო ასამბლეაში დანიის სამეფოს მუდმივმოქმედ დელეგაციასთანაც გვექნება საუბარი, რომელიც თბილისს დღეს ეწვევა და ეუთოს მოქმედ თავმჯდომარესთანაც, რომელიც საქართველოში ხვალ ჩამოვა", - განაცხადა კალანდაძემ.
მისივე განმარტებით, დანიელ პარლამენტარებთან შეხვედრისას აქტიურად დადგება საკითხი იმასთან დაკავშირებითაც, თუ რა სახის დახმარება შეიძლება აღმოუჩინოს დანიამ საქართველოს ევროსაბჭოში მიღებულ რეზოლუციებთან მიმართებაში. როგორც ცნობილია, ევროსაბჭოში საქართველოს საკითხზე სულ 5 რეზოლუციაა მიღებული.
შეგახსენებთ, რომ ევროპის საბჭოს საპარლამენტო ასამბლეაში დანიის სამეფოს პარლამენტის მუდმივმოქმედი დელეგაცია თბილისს დღეს ეწვევა.
როგორც "ჯი-ეიჩ-ენს" პარლამენტიდან აცნობეს, დელეგაციის წევრები პირველ შეხვედრას საქართველოს პარლამენტის თავმჯდომარე
დავით ბაქრაძესთან გამართავენ. დღესვე გაიმართება შეხვედრები საპარლამენტო ოპოზიციისა და მედიის წარმომადგენლებთან.
მოგვიანებით, სტუმრები საქართველოს საგარეო საქმეთა სამინისტროში გაემგზავრებიან და უწყების ხელმძღვანელ გრიგოლ ვაშაძეს შეხვდებიან.
ხვალ, 16 თებერვალს კი, დანიელი სტუმრები საქართველოში ევროკავშირის დელეგაციის წარმომადგენლობის ოფისში მივლენ და ევროკავშირის დელეგაციის პოლიტიკური, ეკონომიკური და ინფორმაციული სამსახურის უფროს რობერტ ლიდელთან გამართავენ შეხვედრას, მოგვიანებით კი, საქართველოში ევროპის საბჭოს წარმომადგენლობის ოფისს ეწვევიან და ევროსაბჭოს გენერალური მდივნის სპეციალურ წარმომადგენელს საქართველოში, ბორის ვოდზს და სამართლებრივი
ჯგუფის ხელმძღვანელ თამარ ჩერგოლეიშვილს შეხვდებიან.
შეხვედრები დაგეგმილია ასევე საქართველოში წითელი ჯვრის საერთაშორისო კომიტეტის დელეგაციის ხელმძღვანელ არიანე ტომბეტთან
და ევროკავშირის მონიტორინგის მისიის ხელმძღვანელ ჰანს იორგ ჰაბერთან.
17 თებერვალს დანიელი სტუმრები ქალაქ გორში გაემგზავრებიან, სადაც მათ პრეზიდენტის რწმუნებულთან შიდა ქართლის რეგიონში ლადო ვარძელაშვილი მიიღებს.
გორიდან სტუმრები ევროკავშირის დამკვირვებელთა (EUMM) მისიის ოფისში მივლენ, სადაც ევროკავშირის დამკვირვებლებს გაესაუბრებიან.
იმავე დღეს სტუმრები ცხინვალის რეგიონში ჩავლენ და საოკუპაციო ზონას დაათვალიერებენ. უკვე იქედან კი, წეროვანის ლტოლვილთა ბანაკში გადაინაცვლებენ. ბანაკის დათვალიერების შემდეგ, მათ ლტოლვილთა და განსახლების მინისტრი კობა სუბელიანი და იძულებით გადაადგილებული პირები შეხვდებიან.
დანიის სამეფოს პარლამენტის ევროპის საბჭოს საპარლამენტო ასამბლეაში მუდმივმოქმედი დელეგაცია თბილისს 18 თებერვალს დატოვებს.
