21 წლის ქართველი სპორტსმენის, მოციგავე ნოდარ ქუმარიტაშვილის ვანკუვერში ტრადიკულად დაღუპვის ზუსტ მიზეზთან დაკავშირებით ექსპერტიზა დასკვნას რამდენიმე დღეში დადებს.
საქართველოს კულტურის, ძეგლთა დაცვისა და სპორტის მინისტრის ნიკა რურუას განცხადებით, სპორტსმენის გარდაცვალების მიზეზის დასადგენას ექსპერტები უკვე მუშაობენ.
"ნოდარ ქუმარიტაშვილის დაღუპვის ზუსტი მიზეზი ჯერჯერობით უცნობია. ამ დროისთვის გამოძიება მიმდინარეობს და ექსპერტიზა დასკვნას რამდენიმე დღეში დადებს. წინასწარი ვარაუდით, ტრაგედია სპორტული ტრასის გაუმართაობამ გამოიწვია", - აცხადებს რურუა.
მისივე განმარტებით, ქუმარიტაშვილის ცხედარს საქართველოში რამდენიმე დღეში, ექსპერტიზის დასრულების შემდეგ გადმოასვენებენ.
შეგახსენებთ, რომ 21 წლის ქართველი სპორტსმენი, მოციგავე ნოდარ ქუმარიტაშვილი კანადაში, ზამთრის ოლიმპიადის წინა შესარჩევი გარბენის დროს გარდაიცვალა.
