საპარალმენტო უმრავლესობის წარმომადგენელი გიორგი გოდაბრელიძე ითხოვს, რომ დავების საბჭოში საჩივრების შეტანა ელექტრონული ფორმითაც გახდეს შესაძლებელი. გოდაბრელიძე ამავე დროს არის დავების საბჭოს წევრი და მიიჩნევს, რომ დეკლარაციების ელექტრონული შევსების პარალელურად აღნიშნული რეფორმების გატარებაც მნიშვნელოვანი იქნება. არგუმენტად კი მეწარმეებისათვის საქმიანობის გაიოლებას ასახელებს. მისი თქმით მეწარმეებს დავების საბჭოში დავების შესატანად ხშირად რეგიონებიდან უწევთ დედაქალქში ჩამოსვლა და მიიჩნევს რომ როდესაც არსებობს დოკუმენტაციის ელექტრონული შევსების საშუალება ეს პრინციპი აღნიშნულ საკითხზეც უნდა გავრცელდეს. გარდა ამისა, გოდაბრელიძე ითხოვს იმასაც რომ მეწარმეებს საგადასახადო ორგანოში ელექტრონული ფორმით წარდგენილი დეკლარაციის ჩასწორების შესაძლებლობაც უნდა მიეცეთ. თუმცა მანამდე ვიდრე საგადასახადო ორგანო შემოწმებას განახორციელებს. ამ მოთხოვნის არგუმენტად გოდაბრელიძე იმ ფაქტს ასახლებს, რომ მეწარმეს საშუალება უნდა ჰქონდეს შემთხვევით გაპარული შეცდომის გასწორება შეეძლოს. აღნიშნული საკანონმდებლო წინადადებები მთავრობას პარლამენტში უკვე ინიცირებულ, საგადასახადო კოდექსში ცვლილებების პროექტში უნდა გაეთვალისწინებინა. როგორც იგი აცხადებს მთავრობის მხრიდან ამის პირობა არსებობდა, თუმცა მთავრობას აღნიშნული პირობა არ შეუსრულებია. სწორედ ამის გამო პარლამენტის ვიცე სპიკერი მიხეილ მაჭავარიანი გოდაბრელიძეს ურჩევს აღნიშნული წინადადებები პარლამენტს განსახილველად თავად წარუდეგინოს როგორც ახალი საკანონმდებლო ინიციატივა. ვინაიდან მთავრობის მიერ წარდგენილი ცვლილებები უკვე დამტკიცებულია. შესაბამისად გოდაბრელიძის თქმით აღნიშნული საკითხები ბიუროს უახლოეს სხდომაზე იქნება ინიცირებული.
მასალის გამოყენების პირობები
