ხვალ, 25 დეკემბერს, 18:00 საათზე, ჭიათურის აკაკი წერეთლის სახელობის სახელმწიფო დრამატულ თეატრში გაიმართება სპექტაკლის - დავით კლდიაშვილის "ირინეს ბედნიერება" - პრემიერა. სპექტაკლის რეჟისორია საქართველოს შოთა რუსთაველის სახელობის თეატრისა და კინოს უნივერსიტეტის დიპლომანტი ჯაბა პაპუაშვილი.
წარმოდგენა ეძღვნება დავით კლდიაშვილის 150 წლის იუბილეს. სპექტაკლი გაიმართება საქართველოს კულტურისა და ძეგლთა დაცვის სამინისტროს ინიციატივითა და თეატრისა და კინოს უნივერსიტეტთან თანამშრომლობით განხორციელებული პროექტის - "დიპლომანტი რეჟისორები საქართველოს რეგიონულ თეატრებში" - ფარგლებში. პრემიერას დაესწრებიან საქართველოს კულტურისა და ძეგლთა დაცვის მინისტრის მრჩეველი ქარუმ წერეთელი და სამინისტროს ხელოვნებისა და განათლების დეპარტამენტის წარმომადგენელი ზაზა სოფრომაძე.
აღნიშნული პროექტის ეგიდით წლის განმავლობაში საქართველოს რეგიონების ოთხ (ბათუმის, ქუთაისის, ახალციხის, თელავის) თეატრში უკვე დაიდგა ახალგაზრდა რეჟისორთა წარმოდგენები.
საქართველოს კულტურისა და ძეგლთა დაცვის სამინისტრომ თითეულ თეატრს სადადგმო ხარჯის სახით 8400 ლარი გამოუყო. კულტურის სამინისტრომ უზრუნველყო, ასევე, დიპლომანტი რეჟისორები სამივლინებო ხარჯებითა და საყოფაცხოვრებო პირობებით.
პროექტი განხორციელდა რეგიონების პროფესიული თეატრების რეპერტუარის გაზრდისა და განახლების, ასევე ახალგაზრდა ხელოვანებისთვის შემოქმედებითი გეგმების რეალიზების პირობების შექმნის მიზნით.
