ჯეიმს კამერონი 2013 წლის ბოლოს "ავატარის" ორი სიკველის გადაღების დაწყებას გეგმავს. იგი იმედოვნებს, რომ ფილმების სცენარებს მომავალი წლის თებერვალში ჩაიბარებს.
კამერონმა სიკველების გადაღების შესახებ ანონსი ჯერ კიდევ 2010 წელს გააკეთა. ცნობილია, რომ კამერონი მეორე და მესამე ფილმებს შორის მუშაობას არ შეწყვეტს.
სხვადასხვა წყაროს მიხედვით, ახალ ფილმში იგი, სავარაუდოდ, "ავატარის" პლანეტის - პანდორის ოკეანეებისა და ზღვების კვლევებით დაკავდება. არსებობს ინფორმაცია, რომლის მიხედვითაც, კამერონი მეოთხე ფილმსაც გადაიღებს.
კამერონის მიერ გადაღებული "ავატარი" ეკრანებზე 2009 წლის დეკემბერში გამოვიდა. 273-მილიონიანმა ფილმმა კინოგაქირავებაში 2,7 მილიარდი აშშ დოლარი მოაგროვა. ფილმი დღემდე ყველაზე საკასო ფილმების რეიტინგში ლიდერობს, მეორე ადგილზეა ასევე კამერონის "ტიტანიკი", რომელიც ეკრანებზე 1997 წელს გამოვიდა.