13 დეკემბერს, ქართველი მხატვრის, ნიკო ფიროსმანაშვილის დაბადებიდან 150 წლის საიუბილეოდ, გიორგი ჩუბინაშვილის სახელობის ქართული ხელოვნების ისტორიისა და ძეგლთა დაცვის კვლევის ეროვნული
ცენტრი (gch-centre.ge) და საქართველოს ეროვნული საპარლამენტო ბიბლიოთეკა (nplg.gov.ge) ერთობლივი პროექტის ფარგლებში გამართავენ მრგვალ მაგიდასა და პუბლიკაციების გამოფენას, სახელწოდებით: "ფიროსმანის მხატვრული ფორმა - გენეზისი და რაობა ".
აღნიშნული ღონისძიება ერთგვარი პრელუდიაა ვრცელი პროექტისა, რაც ფიროსმანის
ფენომენის ყოველმხრივ კვლევას ისახავს მიზნად. პროექტი გაისად დაგეგმილი
საერთაშორისო ინტერდისციპლინური კონფერენციით დასრულდება .
ჩუბინაშვილის ცენტრი გეგმავს ფართო თანამშრომლობას საქართველოს
წამყვან კულტურის დაწესებულებებთან და თვალსაჩინო უცხოელი და
საზღვარგარეთ მოღვაწე ქართველი მეცნიერების მოწვევას . კონფერენციას
ეწოდება "ფიროსმანი და ქართული კულტურა". იმუშავებს როგორც
ფიროსმანისადმი მიძღვნილი თემატური, ისე თავისუფალი,
ზოგადქართველოლოგიური სექციები .
ამჯერად ღონისძიება, რომელიც დაგეგმილია მრგვალი მაგიდის გარშემო,
გულისხმობს ხელოვნებათმცოდნეთა სამეცნიერო შეხვედრას. დასწრება
შეიძლება საინტერესო აღმოჩნდეს როგორც სტუდენტ-
ხელოვნებათმცოდნეთათვის, ისე ხელოვნებით დაინტერესებული ფართო
საზოგადოებისთვის.
სადისკუსიო საკითხების დასმასა და დისპუტში მონაწილეობს 10 მეცნიერი ჩუბინაშვილის ცენტრიდან, ეროვნული არქივიდან, თბილისის სახელმწიფო უნივერსიტეტიდან, საქართველოს ტექნიკური უნივერსიტეტიდან, ილიას სახელმწიფო უნივერსიტეტიდან, სამხატვრო აკადემიიდან, თეატრისა და კინოს უნივერსიტეტიდან, ხელოვნების
საერთაშორისო ცენტრიდან.
