თბილისის საკონცერტო დარბაზის წინ, საქართველოს კულტურისა და ძეგლთა დაცვის სამინისტროს ინიციტივით, კომპოზიტორ ნუნუ გაბუნიას ვარკვლავის გახსნის ცერემონიალი გაიმართა, რომელსაც საქართველოს კულტურისა და ძეგლთა დაცვის მინისტრის პირველი მოადგილე ალექსანდრე მარგიშვილი დაესწრო.
ვარსკვლავის გახსნამდე თბილისის საკონცერტო დარბაზში შედგა კომპოზიტორის 70 წლისთავისადმი მიძღვნილი საიუბილეო საღამო. კონცერტზე ნუნუ გაბუნიას ცნობილი სიმღერები შეასრულეს მომღერლებმა: მაია ჯაბუამ, დათო ნოზაძემ, ლაშა და ანი ღლონტებმა, ირმა სოხაძემ, თეატრალურის კვარტეტმა, აჩიკო ნიჟარაძემ, ნეკა სებისკვერაძემ, ნატო მეტონიძემ, დათო არჩვაძემ, ლიზა ბაგრატიონმა, ეთერ კაკულიამ, მერაბ ვარდოსანიძემ, ნუკრი კაპანაძემ, სოფო ბედიამ, ლელა თელიამ, კვარტეტმა "ალილომ", დათუნა სირბილაძემ, ნათია პერანიძემ, ნინუცა ბედიაშვილმა, ანსამბლებმა - "ფესვები" და "მუხამბაზი". კომპოზიტორის საიუბილეო კონცერტი თბილისის მერიამ წარმოადგინა.
ნუნუ გაბუნია დაიბადა 1941 წლის 18 ივლისს, ქალაქ თბილისში. 1966 წელს დაამთავრა თბილისის სახელმწიფო კონსერვატორიის საკომპოზიტორო ფაკულტეტი, 1970 წელს კი ვოკალური ფაკულტეტი. 1977 წელს კომპოზიტორს მიენიჭა საქართველოს დამსახურებული არტისტის წოდება. ნუნუ გაბუნიას, ცნობილი სიმღერების ავტორს, შექმნილი აქვს ათობით საბავშვო ნაწარმოები, ასევე, აქვს დაწერილი მუსიკა კინო- და ანიმაციური ფილმებისთვის.
