გრძელდება ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრ ალექსი პეტრიაშვილის სამუშაო ვიზიტი ესტონეთის რესპუბლიკაში. სახელმწიფო მინისტრმა მორიგი ორმხრივი შეხვედრა ესტონეთის თავდაცვის მინისტრ ურმას რეინსალუსთან გამართა, სადაც საუბარი შეეხო საქართველო-ესტონეთს შორის თავდაცვისა და უსაფრთხოების სფეროში ორმხრივი თანამშრომლობის საკითხებს. სახელმწიფო მინისტრმა კიდევ ერთხელ აღნიშნა საქართველოს ტერიტორიული მთლიანობისა და სუვერენიტეტისადმი და საქართველოს ოკუპირებულ ტერიტორიებზე ევროკავშირის სადამკვირვებლო მისიის მანდატის გაგრძელებაში ესტონეთის მხარდაჭერის მნიშვნელობა.
ესტონეთის თავდავცის მინისტრთან შეხვედრაზე ყურადღება გამახვილდა საქართველოს ევროატლანტიკურ სტრუქტურებში ინტეგრაციისა და ავღანეთში ISAF-ის (საერთაშორისო უსაფრთხოების უზრუნველყოფის ძალები) საერთაშორისო მისიის ფარგლებში საქართველოსა და ესტონეთის შეტანილი წვლილის მნიშვნელობაზე.
დღესვე, ალექსი პეტრიაშვილმა შეხვედრა გამართა ესტონეთის პარლამენტის საქართველო-ესტონეთის საპარლამენტო ჯგუფის ხელმძღვანელთან ანდრეს ჰერკელთან.
სახელმწიფო მინისტრმა მადლიერება გამოხატა 2010 წლის 8 აგვისტოს ესტონეთის პარლამენტის მიერ მიღებულ გადაწყვეტილებასთან დაკავშირებით, სადაც რუსეთის მიერ საქართველოს ოკუპაციაა დაგმობილი.
ალექსი პეტრიაშვილმა შეხვედრაზე ისაუბრა საპარლამენტო, განსაკუთრებით ევროსაბჭოს საპარლამენტო ასამბლეის, ფორმატებში ესტონეთის მხარდაჭერის მნიშვნელობაზე და ხაზი გაუსვა ორ ქვეყანას შორის საპარლამენტო დონეზე არსებული თანამშრომლობის გაგრძელებისა და გააქტიურების მნიშვნელობას.