საქართველოს პრემიერ-მინისტრი, პრესკონფერენციაზე ოპონენტებსაც გამოეხმაურა და განაცხადა, რომ დღეს, უმცირესობაში მყოფი პოლიტიკური მოწინააღმდეგეები, ძველ ტრადიციებს აგრძელებენ და ისევ ცრუობენ და ძალადობენ.
"განხორციელებული დაპატიმრებები კითხვებს აჩენს ევროპასა და ამერიკაში და ჩვენ ვახერხებთ პასუხების გაცემას.. მოვიყვან ორ მაგალითს იმის დასამტკიცებლად, რომ ძველი ხელისუფლება ჩვეული იდეოლოგიით აპირებს ცხოვრებას. ახალაისთან დაკავშირებით აცხადებენ, რომ ის არის პოლიტპატიმარი და ლამის ცოტნე დადიანს ადარებენ, ხოლო საზოგადოებრივი მაუწყებლის დირექტორი ჭანტურია, ტელევიზიის ფინანსურ შემოწმებასთან დაკავშირებით, პარალელს ავლებს 2007 წლის 7 ნოემბერთან, ანუ როცა "იმედში" სპეცრაზმი შეიჭრა. ჭანტურია აცხადებს, რომ ზეწოლა ხდება ჟურნალისტებზე. ანუ ისინი ისევ ძალადობენ ჩვენს ცნობიერებაზე და გონებაზე. მოვითხოვ მათგან, ნუ გვაყენებენ შეურაცხყოფას და ნუ ჰგონიათ საზოგადოება ასეთი გონებაჩლუნგი, ის რომ მათ ახალია გამოჰყავთ პოლიტპატიმრად, ესეც ჩვენი შეურაცხყოფაა"- აცხადებს პრემიერ-მინისტრი.
მისივე განმარტებით, ნაციონალური მოძრაობა ისევ ცდილობს, რომ შავი თეთრად გაასაღოს. "მოსახლეობა დღეს გაღიზიანებულია, მას არ დაგვიწყებია ის კადრები, თუ რა ხდებოდა ციხეში, დანაშაულები უნდა იყოს გამოძიებული და წინა ხელისუგლების წარმომადგენლებმა თავი შეიკავონ არასწორი შეფასებებისაგან" - აცხადებს პრემიერ-მინისტრი.
