საქართველოს პრემიერ-მინისტრი ბიძინა ივანიშვილი სასტუმრო „რადისონ ბლუ ივერიაში" ჟურნალისტთა შეკითხვებს პასუხობს. პრემიერ-მინისტრმა მთავრობის ერთთვიანი მუშაობის შედეგები შეაჯამა და განაცხადა, რომ მთავრობის დამტკიცებიდან მოხდა სამინისტროები ფორმირება და უწყებებში საჯარო მოხელეების უმეტესობამ ადგილები შეინარჩუნა და ცვლილება მხოლოდ მინისტრებსა და მოადგილეებს შეეხო.
ივანიშვილის განმარტებით, ზოგიერთ უწყებებში მინისტრის მოადგილეებმაც კი შეინარჩუნეს პოსტები. პრემიერ-მინისტრმა აღნიშნა, რომ ის ბევრს მუშაობს და შაბათ-კვირაც კი ავიწყდება. პრემიერმა აღნიშნა, რომ ქართულმა ოცნებამ წინასსაარჩევნოდ ბევრი დაპირება გასცა და მის შესრულებას ძალიან დიდი მუშაობა სჭირდება.
„ქვეყანაში უნდა აღდგეს ბალანსი და დამკვიდრდეს სამართლიანობის განცდა", - განაცხადა პრემიერმა.
ივანიშვილის განმარტებით, პროკურატურა და პოლიცია ხალხის სამსახურში უნდა ჩადგეს. პრემიერის განმარტებით, შეწყდა ძალადობრივი ქმედებები პოლიციის მხრიდან, თუმცა უწყებაში ფორმირების პროცესი არ დასრულებულა, განსაკუთრებით რეგიონებში.
