27 ნოემბერს საიუბილეო დღეები გაიხნება გამოფენით "ვახტანგ კოტეტიშვილის ნაკვალევზე". ექსპოზიციაზე გამოიფინება საქართველოს სახელმწიფო და ლიტერატურის მუზეუმებში, თბილისის სახელმწიფო უნივერსიტეტისა და ლიტერატურის ინსტიტუტის არქივებში, კერძო კოლექციებში, მემკვიდრეებისა და ახლო ნათესავების პირად საკუთრებაში დაცული ხელნაწერები.
შვილების, შვილიშვილების, და-ძმებისა და ნათესავების ოჯახებში გადარჩენილი მემორიალური ნივთები. დამთვალიერებელი საჯაროდ პირველად ნახავს შინაგან საქმეთა სამინისტროს (მაშინდელი ჩეკას) არქივიდან ამოღებული დოკუმენტური მასალის ასლებს. პირველად გამოიფინება ვახტანგ კოტეტიშვილის ექსპედიციებისა და კერძო კოლექციებში დაცული ფოტოსურათები, მეცნიერის ნაკვალევზე ფოლკლორისტების - ეთერ თათარაიძისა და ამირან არაბულის - მიერ ახლახან ჩატარებული ექსპედიციების დიდძალი ფოტომასალა.

28 ნოემბერს გაიმართება ვახტანგ კოტეტიშვილის სიმბოლური საფლავის გვირგვინით შემკობა მთაწმინდაზე, ფოლკლორის სახელმწიფო ცენტრის საკონფერენციო დარბაზში მეცნიერის მიერ მოძიებული პოეტური ნიმუშების საჯარო კითხვა და კონცერტი. კონცერტში მონაწილეობენ ფოლკლორული ანსამბლები და ინდივიდუალური შემსრულებლები.

ქართველი ლიტერატურათმცოდნე, კრიტიკოსი, ფოლკლორისტი, მოქანდაკე, ხელოვნებათმცოდნე ვახტანგ კოტეტიშვილი 1893-1937წწ. მოღვაწეობდა.კოტეტიშვილი ქართული ფოლკლორისტიკის ერთ-ერთ ფუძემდებლად მიიჩნევა. მან ჩაუყარა საფუძველი საქართველოში მეცნიერულ-ფოლკლორულ ექსპედიციას. 1934 წელს გამოსცა "ხალხური პოეზიის" პირველი ტომი.