საქართველოს ეროვნული ბანკის პრეზიდენტი საპარლამენტო უმრავლესობის ლიდერის დავით საგანელიძის განცხადებას ეხმიანება. საგანელიძემ გიორგი ქადაგიძე საბოტაჟის მცდელობაში დაადანაშაულა.
ეროვნული ბანკის პრეზიდენტი აცხადებს, რომ ის ცდილობდა ექსპერტებისა თუ პოლიტიკოსების მწვავე განცხადებებზე, საჯარო განცხადებები არ გაეკეთებინა, თუმცა როდესაც საქმე საბოტაჟს ეხება, მან საჭიროდ ჩათვალა განცხადების გაკეთება. გიორგი ქადაგიძე დავით საგანელიძის ბრალდებებს სებ-ზე ზეწოლად აფასებს.
„საქართველოს ეროვნული ბანკი და მე, როგორც მთავარი საფინანსო ინსტიტუტის ხელმძღვანელი, ყოველთვის ვერიდებოდი მკვეთრი განცხადებების გაკეთებას. ჩვენ თითქმის არ გვიპასუხია ამა თუ იმ ექსპერტის, ან რიგი პოლიტიკოსების სრულიად დაუმსახურებელ ბრალდებებზე. არა იმიტომ, რომ ჩვენ პასუხი არ გაქვს, ამის მიზეზი გახლავთ ის პასუხისმგებლობა, რომელიც ჩვენ გვაკისრია ქვეყნისა და თითოეული მოქალაქის წინაშე. ჩვენ არასოდეს დავაყენებთ ქვეყნის სტაბილურობას რისკის ქვეშ, რაოდენ დიდი არ უნდა იყოს ცდუნება ვუპასუხოთ ამა თუ იმ ბრალდებას, ხშირ შემთხვევაში, როგორი აბსურდული არ უნდა იყოს ეს. თუმცა, ამჯერად, აუცილებლად მიმაჩნია, ვუპასუხო საპარლამენტო უმრავლესობის ლიდერის განცხადებას, რომელიც მან გუშინ ბიუჯეტის პროექტის განხილვისას გააკეთა. მან სრულად უარგუმენტოდ განაცხადა, რომ საქართველოს ეროვნული ბანკი თავისი უმთავრესი ფუნქციის - საბანკო ზედამხედველობის შესრულების მომენტში ახდენს საბოტაჟს ქვეყნის წინაშე. მინდა ხაზი გავუსვა, რომ ეს არ არის განცხადება გაკეთებული, რომელიმე ექსპერტის ან დამოუკიდებელი პოლიტიკოსის მიერ. ეს განცხადება გაკეთებულია საპარლამენტო უმრავლესობის ლიდერის მხრიდან, პარლამენტის მაღალი ტრიბუნიდან, მაშინ როდესაც საზოგადოებას აცნობს საპარლამენტო უმრავლესობის პოზიციას ამა თუ იმ საკითხთან მიმართებაში. ასეთი უაპელაციო ბრალდება, იმ ინსტიტუტის მიმართ, რომელიც გახლავთ ქვეყნის ფინანსური სტაბილურობის მთავარი გარანტი, რომლის დამოუკიდებლობაც გარანტირებულია კონსტიტუციით, ჩვენ გვაძლევს მყარ საფუძველს ვივარაუდოთ რომ ადგილი აქვს სებ-ზე ზეწოლისა და გავლენის მოპოვების ღია მცდელობებს"- აცხადებს ქადაგიძე.
ეროვნული ბანკის პრეზიდენტი დავით საგანელიძისგან ოფიციალურ განმარტებებსაც ითხოვს, თუ რა კონკრეტულ ქმედებებს ეფუძნებოდა მისი ბრალდებები.
„ქვეყნის საბანკო სისტემამ მრავალჯერ დაადასტურა თავისი სიძლიერე და სტაბილურობა, იმედი მაქვს, რომ ამ მიმართულებით კითხვები არ არსებობს. ამიტომ ერთხელ და საბოლოოდ წერტილი უნდა დაესვას, უპასუხისმგებლო განცხადებებით, ანტისაბანკო ისტერიის გაღვივების და სექტორის დისკრედიტაციის მცდელობებს.
მინდა დავუბრუნდე ბატონი საგანელიძის განცხადებას, და მივმართო მას, რომ განუმარტოს საზოგადოებას და მათ შორის, მეც თუ რას ეფუძნებოდა მისი განცხადება, რაში გამოიხატება ასეთი მძიმე ბრალდება, რომ თითქოს სებ-ი ბოლო დღეებში ახდენს საბოტაჟს.
და ბოლოს მე როგორც ეროვნული ბანკის პრეზიდენტმა არაერთხელ გამოვთქვი მზადყოფნა ვითანამშრომლო ახალ სამთავრობო გუნდთან, ჩემი მზადყოფნა ძალაშია. უფრო მეტიც, მზად ვარ ნებისმიერ დროს, პარლამენტის ნებისმერ ფრაქციასთან წარვდგე და აუხსნა ქვეყნის ეროვნული ბანკის მაკროეკონომიკური და საზედამხედველო პოლიტიკის შესახებ", - აცხადებს გიორგი ქადაგიძე.
