გენერალური მდივანი, როგორც ჩანს, ვარაუდობდა, რომ ვიდეო, რომელსაც საკმაოდ ბევრი მოწონება ჰქონდა, თავისი პუნქტებით საზოგადოების გარკვეული ნაწილის დაინტერესებას გამოიწვევდა, ხოლო მისი განხილვა კომენტარების სახით იქნებოდა წარმოდგენილი.

ღამით, ვიდეოს მართლაც უამრავი კომენტარი გაუჩნდა, თუმცა არა ნატოს წევრი ქვეყნების მოქალაქეების, ან ავღანელების მხრიდან. მალე რასმუსენის გვერდი ქართველებმა აიკლეს მრავალრიცხოვანი კომენტარებით, თუმცა, ამ კომენტარებს არანაირი კავშირი არ ჰქონია ავღანეთის კამპანიასთან.

ქართველები უკმაყოფილონი დარჩნენ ანდერს ფოგ რასმუსენის განცხადებით, რომ ის შეშფოთებულია, საქართველოში მცირე ხნის წინ განხორციელებული დაპატიმრებებით. საქმე ეხებოდა ყოფილი შსს მინისტრის, ბაჩო ახალაიას და კიდევ ორი სამხედრო მაღალჩინოსნის დაკავებას. რასმუსენმა იმედი გამოთქვა, რომ საქართველოში პოლიტიკური მოწინააღმდეგეების ამ ფორმით დევნა არ მოხდება. ეს განცხადება კი, როგორც ცნობილია, რასმუსენმა საქართველოს პრემიერ-მინისტრის, ბიძინა ივანიშვილის ბრიუსელში ვიზიტის დროს გააკეთა.

როგორც საიტი წერს, რასმუსენის განცხადებამ იმდენად აღაშფოთა "ფეისბუქის" ქართველი მომხმარებელი, რომ მათ ნატოს გენმდივნის საიტზე ფართომასშტაბიანი ტროლინგი მოაწყვეს, რომელიც მთელი ღამის განმავლობაში გრძელდებოდა. კომენტარები, ძირითადად, აგრესიული და შეურაცხმყოფელი შინაარსის იყო. ერთ-ერთმა ქართველმა მომხმარებელმა კი, რასმუსენის გვერდის ანალოგიც შექმნა და გენმდივნის სახელით კომენტარი დაწერა: გეყოთ, დაწექით დასაძინებლად! როგორც რასმუსენის გვერდის ადმინისტრატორმა განაცხადა, შეტევის მონაწილეები, ძირითადად, გაკრიტიკებული პარტიის მხარდამჭერები იყვნენ. ვრცელდება ინფორმაცია, რომ ამ თემაზე კომენტარი თავად გენმდივანმაც გააკეთა, რომელმაც სინანული გამოთქვა შეურაცხმყოფელი და ცილისმწამებლური გამოხმაურებების გამო.