საქართველოს პრეზიდენტი ბრიუსელში ევროკავშირის ინსტიტუტების წარმომადგენლებთან ერთად სამუშაო სადილს დაესწრო და შეკრებილ საზოგადოებას მიმართა. პრეზიდენტის ადმინისტრაციის ინფორმაციით მიხეილ სააკაშვილმა დემოკრატიული რეფორმებისა და ევროატლანტიკურ სტრუქტურებში საქართველოს ინტეგრაციის მნიშვნელობაზე ისაუბრა.
მისი თქმით, დამოუკიდებლობის აღდგენის შემდეგ, ქვეყანამ რთული პერიოდი გაიარა, თუმცა ბოლო წლების განმავლობაში ბევრი რამ რადიკალურად შეიცვალა.
ქვეყნის პირველი პირის განცხადებით, ევროსტრუქტურებში გაწევრიანების გზაზე საქართველომ მნიშვნელოვანი ნაბიჯები გადადგა და ევროკავშირთან თავისუფალი ვაჭრობისა და უვიზო მიმოსვლის ხელშეკრულებების გაფორმებასთან დაკავშირებული მოლაპარაკების პროცესში ქვეყანა კვლავაც წინ მიიწევს. მიხეილ სააკაშვილმა ყურადღება საქართველოში მიმდინარე დემოკრატიულ პროცესებზეც გაამახვილა.
