„ერთ - ერთი პირველი, რა დავალებაც იქნება ჩემგან მიცემული პროკურორებისთვის, ლაფანყურის ოპერაციასთან დაკავშირებული საქმის შესწავლაა. ვვარაუდობ, რომ პარასკევისთვის უკვე უნდა მქონდეს დეტალური მონაცემები თუ სად, რა სტადიაზეა გამოძიება და კიდევ თუ არის რაიმე გასაკეთებელი", - განაცხადა მთავარმა პროკურორმა არჩილ კბილაშვილმა ტელეკომპანია „მაესტროს" ეთერში.
„გარწმუნებთ ერთ რამეს, რომ იმის მიხედვით, რაც ყოველგვარი მიკერძოების გარეშე დაგხვდება, რასაც ვნახავთ და რასაც მოვიძიებთ, თუ საჭიროა, მივიღებთ ადეკვატურ გადაწყვეტლებას. არანაირად არ შეგვეშინდება, რომ თუ შესაწყვეტია საქმე, შევწყვიტოთ, თუ შესაცვლელია ბრალდება, შევცვალოთ, თუ გასაძლიერებელია, გავაძლიეროთ. არავის წინაშე ვალში არ ვართ, გარდა იმისა, რომ შევასრულოთ ის მოვალეობა, რაც კანონით გვაკისრია", - აღნიშნა კბილაშვილმა.
როგორც ცნობილია, საქართველო - დაღესტნის საზღვარზე, ლოპოტას ხეობაში საქართველოს შსს-მ ე.წ. ანტიტერორისტული ოპერაცია 28 აგვისტოს, გვიან ღამით დაიწყო. შსს-ს ცნობით, სპეცოპერაცია ლაფანყურის ტყიდან 5 ახალგაზრდის გატაცებას მოჰყვა. არსებული ინფორმაციით, ახალგაზრდები 26 აგვისტოს დაიკარგნენ. შსს ირწმუნებოდა, რომ შეიარაღებულმა ჯგუფმა საქართველოს საზღვარი გადმოკვეთა და ახალგაზრდები მძევლებად აიყვანა. 29 აგვისტოს შსს-მ გაავრცელა ინფორმაცია, რომ ოპერაციისას დაიღუპა შსს-ს ორი თანამშრომელი და სამხედრო ექიმი, დაიჭრა 5 ქართველი სპეცრაზმელი, მოხდა 11 დივერსანტის ლიკვიდაცია, 6 კი - ალყაში ჰყავდათ მოქცეული. საბოლოოდ აღმოჩნდა, რომ ლიკვიდირებული იყო შეიარაღებული ჯგუფის 7 წევრი.