ნინა ხატისკაცი არ იქნება ომბუდსმენობის ერთადერთი კანდიდატი, ვისაც საპარლამენტო კომიტეტებში მოუსმენენ - აღნიშნული დაპირება არასამთავრობო სექტორის წარმომადგენლებმა პრემიერ-მინისტრთან შეხვედრისას მიიღეს.
გადაწყდა, რომ სავარაუდოდ, მომდევნო კვირას სახალხო დამცველის პოსტზე დასახელებულ ყველა კანდიდატურას საპარლამენტო კომიტეტებში მოუსმენენ.
"ჩვენი აზრით, არ არის სწორი, კვირების განმავლობაში გაცხოველებული დისკუსია მიდიოდეს სახალხო დამცველთან დაკავშირებით, შემდეგ კი უცებ სიურპრიზის წინაშე დავდგეთ და ყველა დასახელებული კანდიდატურა იგნორირებული იყოს", - განაცხადა ახალგაზრდა იურისტთა ასოციაციის თავმჯდომარემ თამარ ჩუგოშვილმა, რომელმაც აღნიშნა, რომ საპარლამენტო კომიტეტებში სახალხო დამცველის კანდიდატების განხილვის შემდეგ, შესაძლოა, ხატისკაცის კანდიდატურა ან დარჩეს, ან გადაიხედოს.
შეგახსენებთ, რომ უმრავლესობამ სახალხო დამცველი კანდიდატურად ნინა ხატისკაცი დაასახელა.
