უზენაესი სასამართლოს თავმჯდომარე კონსტანტინე კუბლაშვილი იუსტიციის სამინისტროს მიერ წარმოდგენილ საკანონმდებლო ცვლილებათა პაკეტს არ ეთანხმება.
როგორც ცვლილებების პროექტის პრეზენტაციის ფარგლებში კოტე კუბლაშვილმა განაცხადა, საკანონმდებლო პაკეტი ის ნაწილი, რომელიც იუსტიციის საბჭოს შეეხება მისთვის მიუღებელია.
"ერთი-ორი ცვლილების გარდა, რომელზეც ჩვენ ისედაც თანახმა ვიყავით, ეს საკანონმდებლო ცვლილებათა პაკეტი ჩვენთვის მიუღებელია, განსაკუთრებით მიუღებელია ცვლილებები, რომელიც იუსტიციის საბჭოს შეეხება. ეს არის ნაბიჯი უკან სასამართლოს დამოუკიდებულობიდან", - განაცხადა კუბლაშვილმა და დასძინა, - " ამ ცვლილებებს ჩვენ მხარს ვერ დავუჭერთ, მით უმეტეს იმ ფონზე, რომ ჩვენთან თანამშრომლობის გარეშე მოხდა მათი შემუშავება".
იუსტიციის სამინისტროს მიერ წარმოდგენილ საკანონმდებლო ცვლილებათ პირველი პაკეტი ეხება იუსტიციის საბჭოს, ხოლო მეორე პაკეტი სისხლის სამართლის კოდექსსა და საქართველოს სისხლის სამართლის საპროცესო კოდექსში ცვლილებების განხორციელებას.
ცვლილებათა მიხედვით, დანაშაულთა და განაჩენთა ერთობლიობის დროს სასჯელთა უპირობო შეკრების წესი იცვლება.
