იურიდიულ საკითხთა კომიტეტის დღევანდელ სხდომაზე საქართველოს პრეზიდენტის მიერ რატიფიცირებისთვის წარდგენილი დოკუმენტი განიხილეს.
საკითხი ეხება საქართველოს მთავრობასა და თურქეთის რესპუბლიკის მთავრობას შორის შეთანხმებას - "საქართველოში "ბაქო-თბილისი-ყარსის" ახალი სარკინიგზო ხაზის "ახალქალაქი-ყარსის" მონაკვეთზე დაგეგმილი სარკინიგზო გვირაბის მშენებლობის ხელშეწყობის შესახებ", რომლის ძირითად პრინციპებზე კომიტეტის წევრებმა წინა სხდომაზე იმსჯელეს, თუმცა მაშინ საბოლოო გადაწყვეტილება ვერ მიიღეს.
კომიტეტის წევრებმა დღეს შინაგან საქმეთა სამინისტროს წარმომადგენლისგან განმარტება მიიღეს შეთანხმების იმ პუნქტთან დაკავშირებით, რომელიც პირთა მიერ საზღვრის გადაკვეთის პროცედურებს ეხება.
შეთანხმების მიხედვით, გვირაბის მშენებლობაში მონაწილე საქართველოს და თურქეთის რესპუბლიკის მოქალაქეებს საქართველოს სახელმწიფო საზღვრის ერთი კონკრეტული უბნის გავლა ერთობლივი კომისიის მიერ დადგენილი "საზღვრის გადაკვეთის მოწმობის" წარდგენის შემთხვევაში მაშინ შეეძლებათ, თუკი პარალელურად პირადობის დამადასტურებელ მოწმობას ან პასპორტს წარადგენენ. აღმასრულებელი ხელისუფლების წარმომადგენელთა მხრიდან მიღებული განმარტების შემდეგ, კომიტეტის წევრებმა პარლამენტის პლენარულ სხდომაზე შეთანხმების სარატიფიკაციოდ გატანას ერთხმად დაუჭირეს მხარი.