„ქართული ოცნებიდან" ლაგოდეხის მაჟორიტარი დეპუტატობის ყოფილმა კანდიდატმა ლუკა კურტანიძემ შესაძლოა, კახეთის გუბერნატორი ზურაბ ჭიაბერაშვილი ჩაანაცვლოს. „რასაც გადაწყვეტს ბატონი ბიძინა ივანიშვილი, ისე მოვიქცევი",- განუცხადა კურტანიძემ კახეთის საინფორმაციო ცენტრს.
„გუბერნატორად კი არა, მწყემსად რომ მითხრას წასვლა ბატონმა ბიძინამ, საერთო საქმისთვის, იმისთვისაც მზად ვარ", - აღნიშნავს კურტანიძე.
ლუკა კურტანიძე 2012 წლის 1 ოქტომბრის საპარლამენტო არჩევნებში კენჭს ლაგოდეხში იყრიდა, თუმცა არჩევნები წააგო. კურტანიძემ 8 493 ხმა (36,95%) მიიღო. მისმა კონკურენტმა „ნაციონალური მოძრაობიდან" გია გოზალიშვილმა კი 13 330 ხმა (57,99%).
როგორც ცნობილია, საქართველოს პრეზიდენტმა მიხეილ სააკაშვილმა კახეთის გუბერნატორად 16 ოქტომბერს შრომის, ჯანმრთელობისა და სოციალური დაცვის ყოფილი მინისტრი ზურაბ ჭიაბერაშვილი დანიშნა. გუბერნატორის თანამდებობა ვაკანტური აგვისტოდან იყო. ყოფილმა გუბერნატორმა გიორგი ღვინიაშვილმა საპარლამენტო არჩევნებში მიიღო მონაწილეობა და გურჯაანის მაჟორიტარი დეპუტატი გახდა.
მოქმედი კანონმდებლობით, გუბერნატორებს საქართველოს პრეზიდენტი ნიშნავს და ისინი ანგარიშვალდებულები არიან პრეზიდენტის წინაშე, თუმცა მთავრობა განიხილავს „საქართველოს მთავრობის სტრუქტურის უფლებამოსილებისა და საქმიანობის წესის შესახებ" საქართველოს კანონში ცვლილებების პროექტს, რომლის თანახმადაც, რეგიონების გუბერნატორებს, პრეზიდენტის ნაცვლად, პრემიერ-მინისტრი დანიშნავს.
