საქართველოს მთავრობა რუსეთთან მოლაპარაკებებისათვის სრულ მზადყოფნაშია, - აცხადებს ევროინტეგრაციის საკითხებში სახელმწიფო მინისტრი ალექსი პეტრიაშვილი.
"უაღრესად მნიშვნელოვანია რუსეთთან ურთიერთობების მოწესრიგების მიზნით მოლაპარაკებების დაწყება. არ ველით იმას, რომ ძალიან სწრაფად, მოკლე დროში იქნება რაიმე განსაკუთრებული გარღვევა, მაგრამ მოლაპარაკების პროცესი, რომელიც იქნება საკმაოდ რთული, დიპლომატიური, აუცილებლად დასაწყებია და ჩვენ ამ მოლაპარაკების დასაწყებად მზად ვართ",- განაცხადა პეტრიაშვილმა.
შეგახსენებთ, რომ პრემიერ-მინისტრმა თავის სპეციალურ წარმომადგენლად რუსეთის ფედერაციაში ზურაბ აბაშიძე დანიშნა. ბიძინა ივანიშვილის თქმით, აბაშიძე გამოცდილი დიპლომატია და კარგი კავშირები აქვს რუსეთთან. ივანიშვილი იმედს გამოთქვამს, რომ ქართული მხარის მიერ გადადგმულ ამ ნაბიჯს რუსეთის მხრიდან საპასუხო ნაბიჯები მოჰყვება. როგორც პრემიერმა განაცხადა, პირველ რიგში სავაჭრო და კულტურული ურთიერთობები აღდგება, რის შემდეგაც დიპლომატიური ურთიერთობის აღდგენა დაიწყება. ექსპერტების შეფასებით, აბაშიძე კარგი დიპლომატია და რუსეთთან ვაჭრობისა და კომუნიკაციების საკითხების დარეგულირებას შეძლებს.