საქართველოს პრემიერ-მინისტრი ბიძინა ივანიშვილი რუსთავის #16 სასჯელაღსრულების დაწესებულებაში მიმდინარე პროცესებში საბოტაჟის ნიშნებს ხედავს. როგორც ჟურნალისტებთან ივანიშვილმა განაცხადა ის უკვე შეხვდა სასჯელაღსრულების პრობაციისა და იურიდიული დახმარების საკითხთა მინისტრს სოზარ სუბარს.
,, ამ თემასთან დაკავშირებით სოზარ სუბარს შევხვდი და ის სწავლობს, მუშაობს ამ თემაზე და კარგად ერკვევა, რა ხდება. იქაც არის საბოტაჟის ნიშნები. არის ეჭვები, რომ ეს ვიღაცების მიერ ორგანიზებულია. უახლოეს დროში გავერკვევით ალბათ და დავალაგებთ სიტუაციას",- განაცხადა ივანიშვილმა.
შეგახსენებთ, რომ რუსთავის #16 სასჯელაღსრულების დაწესებულებაში უკვე ორი დღეა, რაც დაძაბული ვითარებაა, გავრცელებული ინფორმაციით, პატიმრები ციხის ახალი დირექტორის ლევან აბურჯალინის გადაყენებასა და სოზარ სუბართან შეხვედრას ითხოვენ.
