კვირის ბოლომდე მთავრობა 2013 წლის ბიუჯეტის პროექტის მთავარ პრიორიტეტებზე იმსჯელებს. როგორც ფინანსთა მინისტრმა ნოდარ ხადურმა განმარტა, მოხდება თავდაპირველი პრიორიტეტების შემუშავება, რომელიც პარლამენტთან მუშაობისა და კონსულტაციების შემდეგ კიდევ უფრო დაიხვეწება.
„თავისთავად ცხადია, რომ ბიუჯეტის პარამეტრები მნიშვნელოვნად არ შეიცვლება. უბრალოდ შიგნით სახსრები სერიოზულად გადანაწილდება და მოხმარდება ყველა იმ ვალდებულების შესრულებას რომელზედაც ჩვენ ვსაუბრობდით, ესაა ჯანდაცვის საყოველთაო დაზღვევა, ესაა პენსიის მოწესრიგება და მომავალი წლიდან ჩვენ დავიწყებთ პენსიის მიახლოებას საარსებო მინიმუმთან, ეს არის ასევე განათლების სფერო გარდა ამისა გაიზრდება სოფლის მეურნეობის სფეროს დაფინანსება"- განმარტავს მინისტრი.
ნოდარ ხადურის განმარტებით, ფინანსთა სამინისტროს დაფინანსება 10 %-ით შემცირდება. „ანუ აღარ ავაშენებთ ისეთი ტიპის დაწესებულებას, რომელიც ამ ეტაპზე საჭირო არ არის. ძალიან კარგია, როცა ვაშენებთ გეზებს, მაგრამ ჯობია ახლა თანხა მივმართოთ იქითკენ, სადაც უფრო საჭიროა, იმედი მაქვს, რომ ჩემი კოლეგები იუსტიციის, თავდაცვის და შს სამინისტროდან ანალოგიურ წინადადებებს წარმოგვიდგენენ, თუმცა ეს იმას არ ნიშნავს, რომ ჩვენ თანამშრომლებს შევამცირებთ ან ხელფასებს გავანახევრებთ", - განმარტავს ფინანსთა მინისტრი.
