საქართველოს თავდაცვის მინისტრმა ირაკლი ალასანიამ დღეს საზოგადოებას მოადგილეები წარუდგინა. თავდაცვის მინისტრის პირველი მოადგილის თანამდებობას ლევან დოლიძე დაიკავებს, რომელიც იმავდროულად თავდაცვის უწყების საპარლამენტო მდივნის ფუნქციას შეასრულებს. მისი მუშაობის ძირითადი მიმართულება თავდაცვის სამინისტროში გასატარებელი რეფორმები იქნება, რაც საქართველოს შეიარაღებულ ძალებზე სამოქალაქო კონტროლის ამაღლებას გულისხმობს. ლევან დოლიძე თავდაცვის უწყებას საერთაშორისო ურთიერთობებისა და ევროატლანტიკურ სტრუქტურებში ინტეგრაციის კუთხით გაუწევს კოორდინირებას.
ლევან დოლიძე 2012 წლის ივლისიდან „Must Carry"-ის მონიტორინგის ჯგუფს ხელმძღვანელობდა. მანამდე ლევან მიქელაძის სახელობის ფონდის დირექტორად მუშაობდა. 2009-2010 წლებში ლევან დოლიძე შპს „მაგთიკომის" იურისტი იყო. იგი 2006-2008 წლებში დიპლომატიურ საქმიანობას ეწეოდა, კერძოდ იყო საქართველოს კონსული შვეიცარიაში.
თავდაცვის მინისტრის მოადგილეები ასევე იქნებიან ალექსანდრე ბურჭულაძე და ირაკლი გეგეჭკორი.
ალექსანდრე ბურჭულაძის ძირითადი მიმართულება თავდაცვის სამინისტროში საფინანსო დისციპლინის და კონტროლის დამყარება იქნება.
ალექსანდრე ბურჭულაძე - 2004 შპს ჯორჯიან მენეჯმენტ კონსალტინგ გრუპ "GMCG" - მმართველი პარტნიორია, ამავე დროს იგი შპს "EXDI GROUP" - მთავარი აღმასრულებელი ხელმძღვანელის მრჩევლად მუშაობდა. 2002-2004 წლებში ალექსანდრე ბურჭულაძე Ernst & Young (დსთ) საკონსულტაციო მომსახურებას ხელმძღვანელობდა. 2002-2003 წლებში იყო GCG Audit representing Arthur Andersen -ის მენეჯერი. რეგიონში სპეციფიკური გამოცდილებიდან აღსანიშნავია კრიზისების მართვა სხვადასხვა ქართული და საერთაშორისო კომპანიებისათვის, ასევე საერთაშორისო ფინანსური სტრუქტურირება ქართული და ყაზახური კომპანიებისათვის.
ირაკლი გეგეჭკორი თავდაცვითი უსაფრთხოების საკითხებს გაუწევს კოორდინირებას.
ირაკლი გეგეჭკორი - 2008 წლიდან საქართველოს დაზვერვის სამსახურში უსაფრთხოების დირექტორატის უფროსად მუშაობდა. 2006-2007 წლებში ირაკლი გეგეჭკორი აფხაზეთის ავტონომიური რესპუბლიკის მთავრობის თავმჯდომარის მოადგილე იყო. მას მუშაობის მრავალწლიანი გამოცდილება აქვს საქართველოს სახელმწიფო უშიშროების სამინისტროს სხვადასხვა დეპარტამენტში.
