საერთაშორისო დამკვირვებლები უკრაინაში ჩატარებულ არჩევნებს არაგამჭვირვალედ მიიჩნევენ. მათი მტკიცებით, წინასაარჩევნო კამპანია უკრაინაში საკმარისად გამჭვირვალედ არ მიმდინარეობდა, კანდიდატები კი ამ საპარლამენტო არჩევნების დროს არათანაბარ პირობებში იმყოფებოდნენ. განცხადებას ამის შესახებ ეუთოს მისიის დამკვირვებლები ავრცელებენ.
"ეს იყო შედეგი ადმინისტრაციული რესურსის ბოროტად გამოყენებისა, კამპანიის არასაკმარისი გამჭვირვალობისა და პარტიის დაფინანსებისა ასევე მედიის მიერ წინასაარჩევნო კამპანიის არადაბალანსებული გაშუქებისა", _ ნათქვამია განცხადებაში.
ამავდროულად "რეგიონების პარტია" არჩევნების შედეგებს მოსალოდნელს, პროგნოზირებადს და ერთმნიშვნელოვნად მათი გამარჯვების მანიშნებელად წარმოადგენენ. ეს განცხადებები "რეგიონების პარტიის" წარმომადგენლებმა ეგზიტ-პოლების გამოცხადებისთანავე გააკეთეს.
ბოლო მონაცემებით, უკრაინის პარლამენტში 5 პარტია გადის: "რეგიონების პარტია", ოპოზიციური "ბატკივშინა", კომპარტია, პარტია "უდარ"-ი ვიტალი კლიჩკო და ნაციონალისტური პარტია "სვობოდა".
