რუსთაველის თეატრის განვითარების ფონდის ინიციატივით ამერიკის საელჩოსთან გაფორმდა მემორანდუმი, რომელიც ითვალისწინებს სინეტიკის თეატრის მოწვევას საქართველოსა და ამერიკის მეგობრობის 20 წლისთავისადმი მიძღვნილი პროექტის ფარგლებში.
რუსთაველის თეატრის დიდ სცენაზე წარმოდგენილი იქნება ვაჟა-ფშაველას "სტუმარ-მასპინძელი" და უილიამ შექსპირის "მეფე ლირი".
სინეტიკის თეატრი ვაშინგტონში 11 წლის წინ საქართველოდან წასულმა ემიგრანტებმა პაატა და ირინა ციქურიშვილებმა დააარსეს. ორგანიზაცია "ვაშინგტონის თეატრების" პრეზიდენტი ლინდა ლაივი აცხადებს, რომ სინეტეკი ქალაქის უდავო ფავორიტია. სწორედ ეს ორგანიზაცია ავლენს გამარჯვებულებს ვაშინგტონის თეატრალურ ოსკარად წოდებულ ჰელენ ჰეისის პრემიაზე. მიმდინარე წელს 28-ე ცერემონიალზე დედაქალაქის 84 თეატრი მონაწილეობდა და 153 ნომინანტს შორის სინეტიკის ,,მეფე ლირმა" დრამატულ თეატრებში ყველაზე მეტი-11 კატეგორიაში 4 პრიზი აიღო. თავისი არსებობის 11 წლის განმავლობაში კი თეატრს ჰელენ ჰეისის 89 ნომინაცია და 25 პრიზი აქვს მოპოვებული.
სინეტიკის ერთ-ერთი წამყვანი მსახიობი ირაკლი კავსაძეა, წარსულში რუსთაველის თეატრის დასის წევრი და მსახიობ კახი კავსაძის ვაჟი, რომელიც მთავარი როლების გარდა სპექტაკლების ხმის რეჟისურაზედაც მუშაობს. ჰელენ ჰეისის წელს მოპოვებული 4 პრიზიდან ერთ-ერთი ირაკლი კავსაძემ კონსტანტინე ლორთქიფანიძესთან ერთად სწორედ "მეფე ლირის" ხმის რეჟისურაში მიიღო. სპექტაკლში კი ლირს განასახიერებს. ირინა ციქურიშვილმა კი მაყურებელთა ფავორიტს - ბროდვეის სახელგანთქმულ შოუს, "ჰეარსფრეის" მოუგო და ბენ ქუნისთან ერთად საუკეთესო ქორეოგრაფის ჯილდო მიიღო, სილაში ცეკვისთვის ისევ "მეფე ლირში". სპექტაკლში ასევე მონაწილეობს ირაკლი კავსაძის 19 წლის ქალიშვილი ირინა, რომელიც უკვე რამდენიმე წელია სინეტიკის დასში ირიცხება. სინეტიკის თეატრის რეპერტუარში ერთ-ერთი საპატიო ადგილი ვაჟა-ფშაველას "სტუმარ-მასპინძელს" უჭირავს.
პროექტი ხორციელდება რუსთაველის თეატრის განვითარების ფონდის ინიციატივით, ამერიკის საელჩოს, საქართველოს კულტურისა და ძეგლთა დაცვის სამინისტროს, კომპანია "რობერტო ბრავოსა" და "ვი თი ბი ბანკის" ფინანსური მხარდაჭერით.