"დემოკრატიული მოძრაობა" პრემიერ-მინისტრსა და ახალ მინისტრთა კაბინეტს ულოცავს უფლებამოსილების მინიჭებას და აცხადებს, რომ "დემოკრატიული მოძრაობა" რეგიონული და რაიონული ორგანიზაციების რეფორმირებისა და გაძლიერების რეჟიმზე გადადის. პარტიის მთავარი საბჭოს განცხადებაში აღნიშნულია, რომ „დემოკრატიულ მოძრაობას" საკუთარი არსებობის მანძილზე პირველად ეძლევა საშუალება იმუშაოს ნორმალურ პოლიტიკურ გარემოში.
"ამასთან, ვიტოვებთ უფლებას აუცილებლობის შემთხვევაში დავაფიქსიროთ ჩვენი პოზიცია ქვეყნისათვის პრინციპულ და სასიცოცხლოდ მნიშვნელოვან საკითხებზე. დარწმუნებულნი ვართ, რომ კონსტრუქციულ წინადადებებს ახალი ხელისუფლება განიხილავს და გაიზიარებს.
ამასთან, ვთვლით, რომ ახალი ხელისუფლების მოსვლით გაჩნდა შანსი ქვეყანა დაუბრუნდეს ნორმალური პოლიტიკური ცხოვრების რიტმს. შესაბამისად „დემოკრატიულ მოძრაობას" საკუთარი არსებობის მანძილზე პირველად ეძლევა საშუალება იმუშაოს ნორმალურ პოლიტიკურ გარემოში ზეწოლის, პოლიტიკური შანტაჟის, ცილისწამებისა და რეპრესიების გარეშე. აქედან გამომდინარე ჩვენი პოლიტიკური ძალა გადადის საკუთარი პარტიული სტრუქტურების, რეგიონული და რაიონული ორგანიზაციების რეფორმირებისა და გაძლიერების რეჟიმში", - ნათქვამია განცხადებაში.
