საქართველოს ყოფილი საგარეო საქმეთა მინისტრის მოადგილე, სერგი კაპანაძე ახალ მთავრობას მადლობას უხდის იმისთვის, რომ მინისტრის მოადგილის პოსტზე დარჩენა შესთავაზეს. ამის შესახებ ის Facebook-ის საკუთარ გვერდზე წერს.
„მადლობას ვუხდი საგარეო საქმეთა სამინისტროს ყველა თანამშრომელს, ჩვენს ყველა დიპლომატს, რომელიც ქვეყნის გარეთ იმყოფება და სამშობლოს ემსახურება, ასევე, საქართველოში აკრედიტებულ დიპლომატიურ კორპუსს იმ ძალიან ნაყოფიერი თანამშრომლობისთვის და კოლეგიალობისთვის, ასევე მეგობრობისთვის, რაც ამ ბოლო 7 წელიწადს მათთან მაკავშირებდა. ასევე, მადლობას ვუხდი წინა მთავრობის იმ წევრებს, რომლებთანაც საგარეო პოლიტიკურ საკითხებზე მუშაობა მიხდებოდა. ეს მართლაც პროფესიონალთა გუნდი იყო. აქვე მინდა მადლობა მოვუხადო საგარეო საქმეთა სამინისტროს ახალ გუნდს სურვილისთვის, რომ მათთან გამეგრძელებინა მუშაობა. ორშაბათიდან გავაგრძელებ საქმიანობას თბილისის სახელმწიფო უნივერსიტეტში, ასევე ჩემს რამდენიმე ახლო მეგობართან, თანამოაზრესთან და კოლეგასთან ერთად ახლახანს დაარსებულ think tank-ში. ამასთან დაკავშირებით ცალკე გავაკეთებთ განცხადებას ცოტა ხანში. ღრმად ვარ დარწმუნებული, რომ ჩემი გამოცდილება, ცოდნა და უნარები ისევე წარმატებით შემიძლია მოვახმარო ჩემს ქვეყანას, როგორც ამას საგარეო საქმეთა სამინისტროში ვაკეთებდი. დიდი მადლობა ყველა იმ ადამიანს, ვინც დაინტერესდა ჩემი გეგმებით! და, რა თქმა უნდა, გულწრფელად მინდა ვუსურვო წარმატებები საგარეო საქმეთა სამინისტროს და ჩვენს დიპლომატიას!" - წერს კაპანაძე.