აჭარის უმაღლესი საბჭოს პირველი სხდომა შესაძლოა უახლოეს დღეებში დაინიშნოს, ამის შესახებ სააგენტო „ჯი-ეიჩ-ენთან" საუბრისას, საქართველოს პარლამენტის ვიცე-სპიკერმა მურმან დუმბაძემ განაცხადა. დუმბაძის ინფორმაციით, მიმდინარეობს მზადება და სხდომა დღე-დღეზე დაინიშნება, დუმბაძე არ გამორიცხავს, რომ აჭარის უმაღლესი საბჭოს სხდომა ხვალ ან ზეგ ჩატარდეს.
რაც შეეხება აჭარის უმაღლესი საბჭოს ხელმძღვანელს, როგორც მურმან დუმბაძე განმარტავს, საბოლოო კანდიდატურის დასახელება „ქართული ოცნების" ლიდერის ბიძინა ივანიშვილის პრეროგატივაა, თუმცა მისი ინფორმაციით, აჭარის უმაღლესი საბჭოს ხელმძღვანელის პოსტზე ავთანდილ ბერიძის კანდიდატურა იქნება დასახელებული.
შეგახსენებთ, რომ არსებული კონსტიტუციის მიხედვით, აჭარის უმაღლესი საბჭოს სხდომა არჩევნებიდან 30 დღის განმავლობაში, ანუ 1-ელ ნოემბრამდე უნდა გაიმართოს. პირველი სხდომის ჩატარების შემდეგ, კომიტეტებზე და შემდგომ სასესიო სხდომაზე აჭარის უმაღლესი საბჭოს აჭარის მთავრობის თავმჯდომარისა და მთავრობის წევრების სამოქმედო გეგმას მოუსმენს და დაამტკიცებს კიდეც.