"რაც დღეს ვიხილეთ, იყო კარგი პოლიტიკური განზრახვების დეკლარირება, თუ როგორ უნდა გაიზარდოს და განვითარდეს ქვეყანა", - განაცხადა ჟურნალისტებთან უმცირესობის ლიდერმა დავით ბაქრაძემ ბიძინა ივანიშვილის პარლამენტში გამოსვლის კომენტირებისას.
მისი განცხადებით, პრემიერ-მინისტრობის კანდიდატისგან ვერ მიიღეს ინფორმაცია, რა ვადებში უნდა მოახერხოს "ქართულმა ოცნებამ" დაპირებების ასრულება.
"ჩვენი მთავარი ამოცანა იყო, ქართველ ხალხს, ქართველ ამომრჩეველს მიეღო დეტალური ინფორმაცია, როდის შესრულდებოდა ის დაპირებები, რომლისთვისაც ხმა მიცა "ქართულ ოცნებას" - როდის გაიზრდებოდა პენსია, რამდენით გაიაფებოდა კრედიტი, რამდენით დაიწევდა კომუნალური გადასახადი, როდის ამოქმედდებოდა უფასო დახმარების პროგრამა. ეს იყო ამ მოსმენის ძირითადი ამოცანა. ასეთი კონკრეტული ინფორმაცია ჩვენმა ამომრჩეველმა ვერ მიიღო, რადგან არ თქმულა არც ერთი კონკრეტული თარიღი, კონკრეტული ციფრი. რამდენად მისაღებია ასეთი მიდგომა მოსახლეობისთვის, მოსახლეობამ თავად იმსჯელოს. ის, რაც დღეს ვიხილეთ, იყო კარგი პოლიტიკური განზრახვების დეკლარირება, თუ როგორ უნდა გაიზარდოს და განვითარდეს ქვეყანა, მაგრამ ეს არ იყო იმ მთავრობის გეგმა, რომელსაც აქვს წარმოდგენა, თუ რა, როგორ, რა ვადებში უნდა გაუკეთოს მოსახლეობას", _ განაცხადა ბაქრაძემ.
შეგახსენებთ, რომ ბიძინა ივანიშვილი "ნაციონალური მოძრაობის" წევრებს შეხვდა.