ახალი მთავრობა პირობას დებს, რომ ამიერიდან ქვეყანაში უზრუნველყოფილი იქნება მედიის დამოუკიდებლობა და მისი დაფინანსების გამჭვირვალეობა.
როგორც სამთავრობო პროგრამაში "ძლიერი, დემოკრატიული, ერთიანი საქართველოსთვის" არის აღნიშნული, მოხდება სარეკლამო ბაზრის დემონოპოლიზაცია; დაკანონდება "მასთქერისა" და "მასთოფერის" პრინციპები; მოხდება კომუნიკაციების ეროვნული კომისიისა და საზოგადოებრივი მაუწყებლის დეპოლიტიზება; სახელმწიფო ხელს შეუწყობს პრესის გავრცელებას, განსაკუთრებით კი, რეგიონებში.
"პარტიების დაფინანსების სისტემა შეიცვლება ისე, რომ უზრუნველყოფილი იყოს მათი საქმიანობა და საარჩევნო კამპანიის სრულფასოვნად წარმართვა. შესწავლილ იქნება საკუთრების უფლების ტოტალური დარღვევის შედეგად შექმნილი ვითარება და დაისახება მისი გამოსწორების გზები, ქვეყნის რეალური ფინანსური შესაძლებლობის გათვალისწინებით; ასევე შესწავლილ იქნება საქართველოში ბოლო წლებში გავრცელებული "ელიტარული კორუფციის" მასშტაბები და მექანიზმები და დაისახება მისი აღმოფხვრის გზები", - ნათქვამია სამთავრობო პროგრამაში.
ახალი მთავრობის პროგრამაში აღნიშნულია, რომ მთავრობის პოლიტიკა დაეფუძნება საქართველოს მოსახლეობის მიერ მკაფიოდ გამოხატულ ინტერესებს. მოქალაქეთა ჩაბმულობა სამთავრობო პოლიტიკის დაგეგმვისა და რეალიზაციის პროცესის უმთავრესი საფუძველი იქნება.
