"შეხვედრა მნიშვნელოვანი და პოზიტიური ნაბიჯი იყო იმ პროცესში, რომელიც დღეს მიმდინარეობს", - განაცხადა "რუსთავი-2"-თან საუბარში საქართველოს პარლამენტის თავმჯდომარემ, დავით ბაქრაძემ, მიხეილ სააკაშვილისა და ბიძინა ივანიშვილის შეხვედრის კომენტირებისას.
მისი განცხადებით, მოქმედი ხელისუფლება პატივს სცემს ხალხის არჩევანს.
"შეხვედრის ფაქტი უნდა შეფასდეს დადებითად. შეხვედრა იყო მნიშვნელოვანი და პოზიტიური ნაბიჯი იმ პროცესში, რომელიც დღეს მიმდინარეობს. ჩვენ ყველა ერთად ქვეყანაში ვქმნით პრეცედენტს ხელისუფლების მშვიდობიანად გადაბარების, ჩვენ ყველა ერთად ვქმნით პრეცედენტს, როდესაც მოქმედი ხელისუფლება პატივს სცემს არჩევნების შედეგებსა და ხალხის აზრს და მშვიდობიანად გადადის ოპოზიციაში. ამ პროცესში ეს შეხვედრა ძალიან მნიშვნელოვანია. მთავარი სიტყვა, რომლითაც ეს შეხვედრა შეიძლება დახასიათდეს, ეს არის პასუხისმგებლობა ჩვენი ხალხისა და ქვეყნის წინაშე. ამ პასუხისმგებლობით იყო გამსჭვალული პრეზიდენტის სიტყვები. დღევანდელი შეხვედრა ორივე მხარის მხრიდან პოზიტიური ნაბიჯი იყო", - განაცხადა ბაქარაძემ.
შეგახსენებთ, რომ საქართველოს პრემიერობის კანდიდატი ბიძინა ივანიშვილი საქართველოს პრეზიდენტ მიხეილ სააკაშვილს შეხვდა. შეხვედრას "ქართული ოცნების" მხრიდან ირაკლი ალასანია, ირაკლი ღარიბაშვილი, დავით უსუფაშვილი და სოზარ სუბარი ესწრებოდნენ, ხოლო "ნაციონალურ მოძრაობას" გიგა ბოკერია, პავლე კუბლაშვილი, დავით ბაქრაძე და გიგი უგულავა წარმოადგენდნენ.