ქუთაისის პარლამენტში მუშაობა წარმოუდგენელი და სახიფათოა, - განუცხადა "ქართული ოცნების" ოფისში ჟურნალისტებს ახალი მოწვევის პარლამენტის ეკონომიკური განვითარების კომიტეტის თავმჯდომარეობის კანდიდატმა ნოდარ ხადურმა.
მისი თქმით, შენობაში ჩამოდის წყალი, შეტანილია უხარისხო ავეჯი და ტექნიკა. ასევე, შენობაში არც ერთი ფანჯარა არ იღება.
ხადურის თქმით, შენობის მდგომარეობის შესწავლის მიზნით, "ქართული ოცნების" ექსპერტთა ჯგუფი ქუთაისში გაემგზავრა.
"უნდა დადგეს მისი პასუხისმგებლობის საკითხი, ვინც ეს შენობა ააშენა. კონსტიტუციის შესაბამისად პარლამენტი ქუთაისში უნდა შეიკრიბოს. ჩვენ არ ვაპირებთ კონსტიტუციის დარღვევას. ადგილზე გაგზავნილია ექსპერტთა ჯგუფი, რომლებიც შეისწავლიან შენობის მდგომარეობას", - განაცხადა ნოდარ ხადურმა.