21 აპრილს, 14:00 საათზე, კახეთში წინანდალის მუზეუმის ბაღში. ქართული ყველის ფესტივალი გაიმართება.
სოფლის მეურნეობის სამინისტროს ინფორმაციით, ფესტივალის ფარგლებში გაიმართება უძველესი ტრადიციებით დამზადებული ქართული ყველის დეგუსტაცია-გაყიდვა. ფესტივალში მონაწილეობს ორმოცამდე ყველის მწარმოებელი კომპანია და წვრილი ფერმერები საქართველოს ყველა კუთხიდან.
ფესტივალის ფარგლებში გამოფენილი იქნება ქართული ყველისგან დამზადებული ორიგინალური ფიგურები და ტრადიციული სუფრისთვის დამახასიათებელი ექსპონატები.
სოფლის მეურნეობის სამინისტროში განმარტავენ, რომ ფესტივალზე ნაჩვენები იქნება ქართული ყველის დამზადების საინტერესო და განსხვავებული ტექნოლოგია. გარდა ქართულ ბაზარზე არსებული პოპულარული ქართული სახეობებისა, ფესტივალზე წარმოდგენილი იქნება უძველესი და შეიძლება ითქვას დავიწყებული ყველის ნაირსახეობა.
"ფესტივალის ფარგლებში შეგიძლიათ დააგემოვნოთ ქართული ყველისგან დამზადებული მრავალფეროვანი კერძები, სხვადასხვანაირი ხაჭაპური, ელარჯი, ყველიანი კვერები და სხვა. ადგილზე შეგიძლიათ შეიძინოთ ქართული ყველის უამრავი სახეობა და გაეცნოთ ქართული ყველის მახასიათებლებს"- აცხადებენ ფესტივალის ორგანიზატორები.
სოფლის მეურნეობის სამინისტროში განმარტავენ, რომ საქართველო აღიქმება ღვინის სამშობლოდ, მაშინ როცა უძველესი სახეობის ყველის წარმოება 28 საუკუნოვან ისტორიას ითვლის და ამის თაობაზე ინფორმაცია თითქმის არ მიეწოდება მომხმარებელს. ღონისძიების მიზანია, მოხდეს ქართული ყველის წარმოების უძველესი ტრადიციების და ქართული ყველის ნაირფეროვანი სახეობების გაცნობა და მიწოდება მომხმარებლისთვის; ახალი ფერმერების, ყველის მწარმოებელი ქარხნების და მეწარმეების აღმოჩენა და გაცნობა დაინტერესებული პირებისთვის. აღნიშნული ღონისძიება ხელს შეუწყობს ქართული ყველის პოპულარიზაციას და ცნობადობის ამაღლებას როგორც საქართველოში მცხოვრებ უცხოელებში, ისე ადგილობრივ მომხმარებლებში, რაც თავისთავად სამომავლო პერსპექტივაში ხელს შეუწყობს ქართული ყველის გასვლას და დამკვიდრებას საერთაშორისო ბაზარზე.
აღსანიშნავია, რომ ფესტივალზე დასწრება მოწვეული სტუმრების გარდა ნებისმიერ მსურველს შეეძლება, რომელსაც უყვარს ქართული ყველი და ყველისგან დამზადებული კერძები.
აღსანიშნავია ისიც, რომ ვარდების რევოლუციის მოედანზე იქნება უფასო ტრანსპორტი, რომელიც უზრუნველყოფს ფესტივალში მონაწილე პირების გადაყვანას დანიშნულების ადგილზე. ავტობუსები წინანდლის მიმართულებით გავლენ 12:00 საათზე. ფესტივალის დასრულების სავარაუდო დროა 19:00 საათი.