2012 წელს კომპანია "საქკაბელი" გაფართოებას და რეალიზაციის ზრდას გეგმავს. როგორც კომპანიის მმართველმა პარტნიორმა ედიშერ მამალაძემ განაცხადა, „საქკაბელი" პროდუქციის ასორტიმენტის ზრდასთან ერთად, საკუთარი ბრენდირებული მაღაზიების გახსნასაც გეგმავს.
კომპანიის მენეჯმენტი, „საქკაბელში" განხორციელებულ რებრენდინგსაც დადებითად აფასებს და იმედი აქვს, რომ ახალი პროდუქციით დამატებითი ბაზრების დაპყრობასაც შეძლებს.
"საქკაბელმა" რებრენდინგი წარმატებით განახორციელა. ჩვენ შევქმენით ახალი ტიპის საკაბელო პროდუქციები და მივიღეთ საერთაშორისო სერთიფიკატი და აღიარება. „საქკაბელი" ექსპორტზე გავიდა და სამომავლოდ ექსპორტის არეალის გაფართოებას ვგეგმავთ, რათა ჩვენი საექსპორტო პროდუქცია მივაწოდოთ ევროპის, აზიისა და აფრიკის ქვეყნებს. დღეისათვის „საქკაბელი" საკუთარ პროდუქციას სომხეთში ყიდის, თუმცა სამომავლოდ ახალ ბაზრებზე გასვლასაც ვგეგმავთ. საწარმოში მოხდა გადაიარაღება, რამაც საშუალება მოგვცა, რომ უფრო მრავალფეროვანი პროდუქცია გვეწარმებინა და ექსპორტი ჩაგვენაცვლებინა. 2012 წელი კომპანიამ რეპოზიციონირებით დაიწყო და რებრენდინგი განახორციელა. ბრენდის ახალი საიდენტიფიკაციო ატრიბუტიკა ბიზნესორიენტაციასა და წლების განმავლობაში დაგროვილ გამოცდილებას აერთიანებს, რომლის მეშვეობითაც კომპანიამ ბაზარზე ლიდერის პოზიციის დამკვიდრება შეძლო. ჩვენ შევეცადეთ დაგვემსხვრია გავრცელებული სტერეოტიპი "უცხოური კარგია" და შემოგვეტანა ახალი - "ჩვენც შეგვძლებია". „საქკაბელის" პროდუქცია დამზადებულია საქართველოში. ეს ჩვენ გვეამაყება და განსაკუთრებულ პასუხისმგებლობას გვანიჭებს"- აცხადებს „საქკაბელის" მმართველი პარტნიორი ედიშერ მამალაძე.
როგორც სააგენტო „ჯი-ეიჩ-ენთან" საუბრისას მამალაძემ განაცხადა, 2011 წელს „საქკაბელის" რეალიზაციამ 20 მლნ ლარი შეადგინა და წლის განმავლობაში კომპანიამ მოგება 1 მლნ ლარამდე მოგება მიიღო.
როგორც კომპანიის წარმომადგენელი განმარტავს, „საქკაბელის" რეალიზაცია ბრენდირებული მაღაზიების გახსნითაც გაიზრდება. ედიშერ მამალაძის განმარტებით, ამ დროისათვის „საქკაბელს" 4 ბრენდირებული მაღაზია აქვს და სამომავლოდ ანალოგიური მაღაზიების გახსნას რეგიონებშიც გეგმავს.
„საქკაბელის" პრეზენტაციაზე, რომელსაც სასტუმრო „რადისონი" მასპინძლობდა, „საქკაბელმა" გერმანული სააკრედიტაციო კომპანია "ტუვ"-სგან ხარისხის მართვის ISO 9001:2000 სერტიფიკატი მიიღო. "ტუვ"-ის წარმომადგენელი ანა სახატკაია აცხადებს, რომ „საქკაბელმა" დიდი სამუშაო გასწია იმისათვის, რომ თანამედროვე სტანდარტები დაენერგა. მისი თქმით, კომპანიის აუდიტის შედეგად ბევრად საინტერესო შედეგი დაიდო, რაც კომპანიის მხრიდან წინ გადადგმულ ნაბიჯებზე მეტყველებს. "ტუვ"-ის წარმომადგენელი აცხადებს, რომ კომპანიას დიდი პოტენციალი გააჩნია და კომპანიის მენეჯმენტის მხრიდან ყველაფერი უნდა გაკეთდეს კიდევ უფრო მეტი განვითარებისათვის. "ტუვ"-სა და „საქკაბელს" შორის თანამშრომლობა სამომავლოდაც გაგრძელდება, რათა უახლოეს პერიოდში კომპანიის პროდუქციის სერთიფიცირება მოხდეს.
ენერგეტიკისა და ბუნებრივი რესურსების მინისტრის მოადგილე გიორგი ყაველაშვილი კი აცხადებს, რომ სექტორის განვითარებასთან ერთად ქვეყანაში დამხმარე საწარმოებიც ვითარდება.
„ენერგეტიკის სექტორეის აქტიობებმა განაპირობა ის, რომ ქვეყანაში შეიქმნა დამხმარე საწარმოები, რომელიც ჰესებისათვის საჭირო პროდუქციას აწარმოებენ. ამის ნათელი მაგალითია „საქკაბელი" და თითოეული ასეთი საწარმო, რომელიც იქმნება და ანაცვლებს იმპორტს, არის მყარად დადებული აგური ჩვენი ქვეყნის ეკონომიკის განვითარებისათვის"- აღნიშნა გიორგი ყაველაშვილმა.
შეგახსენებთ, რომ "საქკაბელი" 1959 წელს დაარსდა. წარმოების რეაბილიტაცია ახალი მენეჯმენტის მიერ 2006 წლიდან დაიწყო და დღეს 74 ტიპის დასახელების 2000-ზე მეტი დასახელების ასორტიმენტს აწარმოებს. 2006-2007 წლებში ქარხანაში 3 მილიონი დოლარის ინვესტიცია განხორციელდა. 2007-2011 წლებში ქართული პროდუქციით რუსული და სხვა იმპორტული პროდუქციის ჩანაცვლება განხორციელდა: მოხდა საქართველოს ქალაქებისა და სოფლების გამრიცხველიანება, შეიცვალა გარეგანათების სისტემა საქართველოს მსხვილ ქალაქებში, განხორციელდა საქართველოს რკინიგზისთვის სასიცოცხლოდ აუცილებელი სპეციფიკური კაბელების წარმოება, განხორციელდა ექსპორტი სომხეთის რესპუბლიკაში. საწარმოში დასაქმებულია 200 თანამშრომელი, რომელთა საშუალო ხელფასი 600 ლარს აღემატება.