შემოსავლების სამსახური მცირე მეწარმეებს დაბეგვრის ახალ ფორმას - ფიქსირებულ გადასახადს სთავაზობს.
როგორც დღეს გამართულ ბრიფინგზე შემოსავლების სამსახურის უფროსმა ჯაბა ებანოიძემ განმარტა, შემოსავლების სამსახურის ინიციატივით, უახლოეს მომავალში, მცირე მეწარმეებს საშუალება ექნებათ, დაბეგვრის ალტერნატიულ ფორმაზე გადავიდნენ, საუბარია ფიქსირებულ გადასახადზე, რომლის ორი მოდელი ამოქმედდება.
ჯაბა ებანოიძის განმარტებით, ფიქსირებული გადასახადის პირველი მოდელით ის მცირე მეწარმეები ისარგებლებენ, რომლებიც ეწვევიან არა იურიდიული, არამედ ფიზიკური პირების მომსახურებას. მათ არ სჭირდებათ იურიდიული პირებისთვის ხარჯის დამადასტურებელი დოკუმენტისა და ანგარიშფაქტურის გამოწერა. გადასახადის ასეთი ფორმის არჩევის შემთხვევაში ამ კატეგორიის მეწარმეებს მოეხსენებათ სალარო აპარატის გამოყენების აუცილებლობა, საბუღალტრო დოკუმენტაციის წარმოების ვალდებულება და აღარ დაიქირავებენ ბუღალტერს. ისინი დაიბეგრებიან კონკრეტული განაკვეთით თვეში ან კვარტალში. რაც შეეხება განაკვეთებს ამას შემდგომ მთავრობა განსაზღვრას საქმიანობის ტიპისა და ადგილმდებარეობის მიხედვით.
შემოსავლების სამსახურის უფროსი ამბობს, რომ ამ მოდელით სარგებლობას შეძლებენ ისეთი საწარმოები, მაგალითად, როგორებიცაა მცირე საპარიკმახერო, ავტომობილების მცირე სახელოსნო, მცირე პურის საცხობი და ა.შ.
აღსანიშნავია, რომ ალტერნატიული გადასახადის მეორე მოდელი მორგებულია იმ მეწარმეებზე, რომლებიც ეწევიან ვაჭრობას და მათი მომხმარებლები არიან, ასევე ფიზიკური პირები. ამ ტიპის მეწარმეებსაც არ აქვთ შეხება იურიდიულ პირებთან და შესაბამისად არ საჭიროებენ იურიდიული პირებისთვის ხარჯის დამადასტურებელ და სხვა საგადასახადო დოკუმენტაციის გამოწერას.
ასეთი კატეგორიის მეწარმეებისთვის იქნება ფიქსირებული გადასახადი ბრუნვის 3%-ის ოდენობით. პირველი მოდელით მოსარგებლე ბიზნესისგან განსხვავებით, მათ ექნებათ სალარო აპარატის გამოყენების ვალდებულება, რადგან 3%-იანი გადასახადის დაანგარიშება მოხდება სალარო აპარატით დაფიქსირებული შემოსავლიდან.
"ფიქსირებული გადასახადის არჩევის შემთხვევაში, ვაჭრობით დაკავებულ მცირე მეწარმეებსაც აღარ მოუწიათ საბუღალტრო დოკუმენტაციის წარმოება, შესაბამისად გათავისუფლდებიან ბუღალტრის დაქირავების ხარჯებისგან.
კიდევ ერთი შეღავათი, რომლითაც ორივე კატეგორიის მეწარმეები ისარგებლებენ, ისაა, რომ გაუქმდება 100 000 ლარიანი ზღვარი დღგ-ს გადამხდელად აღრიცხვისთვის. მეწარმეს შეეძლება, რომ იმ შემთხვევაშიც კი, თუ მისმა შემოსავალმა წელიწადში გადააჭარბა 100 000-იან ზღვარს, გააგრძელოს ფიქსირებული გადასახადის გადახდა და არ გახდეს დღგ-ს გადამხდელი"- აცხადებს ებანოიძე.
შემოსავლების სამსახურის უფროსი ფიქსირებული გადასახადის შემოღების მიზეზებზე ღიად საუბრობს და განმარტავს, რომ დღეისათვის არსებული რეგულაციით, ბიზნესს ურჩევნია მიკრო ბიზნესის სტატუსით ისარგებლოს, და შემდგომ განვითარებაზე აღარ იზრუნოს, რაც საბოლოო ჯამში ყველა მხარისათვის წამგებიანი ხდება.
"ბიზნესები, რომლებიც გარკვეული რეგულაციის შემოღებამდე არ გადიოდნენ მიკრო ბიზნესის რეგულაციაში, რეგულაციის შემოღების შემდეგ მათი ხელოვნურად დახლეჩვა მოხდა. ერთ-ერთი მაგალითი, რომ გითხრათ, სილამაზის სალონები - ძირითადად იყვნენ იურიდიული პირები, შპს-ები ან სხვა, თუმცა მიკრო ბიზნესის სტატუსის შემოღების შემდეგ, ბიზნესების დაყოფა მოხდა. ანუ სალონს მმართველი იგივე ყავს და ის ნაღდი ანგარიშსწორებით იგივე შემოსავალს იღებს, თუმცა მათ თითოეული ხელოსანი მიკრო მეწარმეებად დაარეგისტრირეს და არ იხდიან გადასახადებს. თუმც ე.წ. ბიზნესის მმართველი შემოსავალს ისევ ძველებურად იღებს და გადასახადებს აღარ იხდის.
ერთის მხრივ ასეთი დახლეჩილობით ჩვენც ვკარგავთ შემოსავლებს და მივიღეთ ისეთი სიტუაცია, რომ მიკრო და მცირე მეწარმეს ექმნება იმის საფუძველი, რომ მცირედ ან მიკროდ დარჩეს. მათ ინტერესი აღარ აქვს, რომ გაიზარდოს, გამსხვილდეს და გაფართოვდეს. ვერ ნახავთ ისეც მცირე მეწარმეს, რომელიც ზრუნავს გაფართოებაზე, ექსტერიერის და ინტერიერის გალამაზებაზე, საკუთარი ბრენდის შექმნაზე და ასე შემდეგ. მათი აზრით, როგორც კი ისინი ვთქვათ ახალ აბრას გამოაკრავენ, ამას დაინახევენ საგადასახადოს ოფიცრები და სხვანაირად დაგვბეგრავენ"- განაცხადა ჯაბა ებანოიძემ, სწორედ აღნიშნული ფაქტორებიდან გამომდინარე შემოსავლების სამსახურმა ალტერნატიული, ფიქსირებული გადასახადების მცნება შემოიღო, რათა ბიზნესს განვითარების საშუალება მიეცეს, საკუთარ თავში აღარ ჩაიკეტოს და სამომავლოდ საკუთარი ბიზნესის განვითარებაზე იფიქროს.
შემოსავლების სამსახურში ფიქრობენ, რომ დაბეგვრის ალტერნატიული ფორმა-ფიქსირებული გადასახადი, ხელს შეუწყობს მცირე საწარმოების რაოდენობის გაზრდას და უკვე არსებული ბიზნესის განვითარებას.
ფიქსირებულ გადასახადთან დაკავშირებული ცვლილებათა პაკეტი, რომელიც საგადასახადო კოდექსში უნდა შევიდეს, უკვე განიხილება საქართველოს პარლამენტში.
