"შავი ლომის" საქმეზე სასამართლო დავა შესაძლოა შეწყდეს. ტილო რომელიც რუსეთის სამართალდამცველ უწყებაში ინახება, შესაძლოა ფიროსმანის ნახატი არ აღმოჩნდეს. "შავ ლომს" სასამართლო ექსპერტიზა უტარდება. ექსპერტები ცდილობენ დაადგინონ ეკუთვნის თუ არა კონკრეტული ნამუშევარი ფიროსმანს. ეჭვი ქართველ იურისტებს რუსეთში ვიზიტისას გაუჩნდათ და სასამართლოს ექსპერტიზის შუამდგომლობით მიმართეს. იმ შემთხვევაში თუ ნახატი ყალბი აღმოჩნდა, მაშინ ყველა იმ პირის სისხლის სამართლის პასუხისმგებლობის საკითხი დადგება, რომლებმაც ნახატი ფიროსმანის "შავ ლომად" გაასაღეს.
შეგახსენებთ, რომ მოსკოვის მხატვრის საგამოფენო დარბაზში 1990-იან წლებში საქართველოდან გატაცებული ნიკო ფიროსმანის ტილო "შავი ლომი" 2 თვის წინ აღმოჩნდა.
შედევრი სამხატვრო აკადემიის ყოფილი რექტორის აპოლონ ქუთათელაძის საკუთრება გახლდათ და მისი ვაჟის ყარამან ქუთათელაძის სახელოსნოში ინახებოდა.
ქუთათელაძეების ოჯახის თქმით, ტილო მათ ყაჩაღური გზით წაართვეს. 21 წლის შემდეგ კი "შავი ლომი" რუსეთში გამოიფინა.
ნამუშევრის რუსეთში მოხვედრის შესახებ ვერსიები საკმაოდ ბევრია. ქართველი სპეციალისტები ეჭვობენ, რომ 90-იან წლებში მოპარული ტილო საზღვარზე გაიტანეს და რუსეთში კერძო კოლექციონერს მიყიდეს. ამის შემდეგ კი ნამუშევარმა დღის სინათლე მოსკოვის საგამოფენო ცენტრში გამოფენისას ნახა.
შეგახსენებთ, ნიკო ფიროსმანის ეს ნამუშევარი ყველაზე ძვირადღირებულია. ფიროსმანის ნამუშევარი 1906 წელსაა შესრულებული. აღსანიშნავია, რომ "შავ ლომზე" საერთაშორისო ძებნა იყო გამოცხადებული.
