როგორც ვაშაძის უწყების ოფიციალურ განცხადებაშია აღნიშნული, ვერტმფრენები 3 კილომეტრით შეიჭრნენ საქართველოს საჰაერო სივრცეში და დაახლოებით 15 წუთის განმავლობაში დაფრინავდნენ საქართველოს სასაზღვრო პოლიციის საგუშაგოს თავზე, ხოლო ამის შემდგომ, ვერტმფრენებმა დატოვეს საქართველოს საჰაერო სივრცე.

"საქართველოს საჰაერო სივრცის მორიგი დარღვევა წარმოადგენს რუსეთის პოლიტიკის გაგრძელებას, რომელიც მიმართულია საქართველოს სახელმწიფოებრიობისა და დამოუკიდებლობის წინააღმდეგ. საერთაშორისო სამართლის ამგვარი უხეში დარღვევა მიზნად ისახავს გამოიწვიოს ქართული მხრიდან შესაბამისი ზომების მიღება, რაც ხელს შეუწყობდა მდგომარეობის შემდგომ ესკალაციას. შექმნილ ვითარებაში ქართულმა მხარემ იმოქმედა თავშეკავებულად და სრული პასუხისმგებლობით, ვინაიდან უსაფრთხოების მდგომარეობის გაუარესება საქართველოსა და მთლიანად რეგიონის ინტერესებში არ შედის", - აღნიშნულია საგარეო საქმეთა სამინისტროს განცხადებაში.

ვაშაძის უწყება მიიჩნევს, რომ რუსეთის ფედერაციის მიერ ექვსპუნქტიანი შეთანხმებით აღებული ვალდებულებების შეუსრულებლობა, საერთაშორისო სამართლის სრული უპატივცემულობა, საქართველოსთან ცეცხლის განუახლებლობის შესახებ შეთანხმების დადებაზე უარი, ოკუპირებული ტერიტორიებიდან ტერორისტული აქტების დაგეგმვა საქართველოს საჰაერო სივრცეში არაეთხელ შემოჭრასთან ერთად ადასტურებს რუსეთის აგრესიულ განზრახვებს საქართველოს მიმართ.

"ამგვარად, აშკარაა რუსეთის მხრიდან ახალი პროვოკაციების განხორციელების მოლოდინი", - იუწყება საგარეო.

განცხადების თანახმად, მომხდარი ინციდენტის შესახებ საქართველოს საგარეო საქმეთა სამინისტრო შესაბამისად მიაწვდის ინფორმაციას გაერო-ს, ეუთო-ს, ევროკავშირს და სხვა რელევანტურ საერთაშორისო ორგანიზაციებს.

"ამასთან ერთად, საგარეო საქმეთა სამინისტრო საერთაშორისო თანამეგობრობისგან მოელის რუსეთის შეიარაღებული ძალების მიერ საქართველოს საჰაერო სივრცის დარღვევის ფაქტის სათანადოდ შეფასებას და მოუწოდებს მას განაგრძოს ზეწოლა რუსეთზე 2008 წლის 12 აგვისტოს ექვსპუნქტიანი შეთანხმების შესრულებისა და საერთაშორისო სამართლის ფუნდამენტური ნორმებისა და პრინციპების პატივისცემის მოთხოვნით", - იუწყება საქართველოს საგარეო უწყება.