ბათუმის ბაზარში ცხენის ხორცი იყიდება, ამის შესახებ ინფორმაციას ტელეკომპანია "TV-25" ავრცელებს. ტელეკომპანიის ინფორმაციით, ბათუმში "ბონის" საკოლმეურნეო ბაზარში ცხენის ხორცი იყიდება.
როგორც ტელეკომპანიასთან საუბრისას ერთ-ერთმა მოვაჭრემ ალექსანდრე აბაშიძემ განაცხადა, ბაზარში საქონლის ხორცთან ერთად დიდი რაოდენობის ცხენის ხორცი იყიდება. მისი თქმით, სავაჭრო ცენტრში ერთი მაცივარია და ისიც ხშირად გამორთულია, რადგან დიდი რაოდენობით ელექტროენერგიას მოიხმარს.
ალექსანდრე აბაშიძე ამტკიცებს, რომ თხის ხორცი ბაზარში მაცივრის ჩაურთველობის გამო დალპა. ცხენის ხორცის გაყიდვის მცდელობაში ბაზრის ექიმმა თავად ალექსანდრე აბაშიძეც დაადანაშაულა. რეზო გორგაძის თქმით, იგი ბაზრის დირექციაზე განაწყენებულია, რადგან დირექტორი სამსახურიდან გათავისუფლებით დაემუქრა. აბაშიძე ამბობს, რომ მას დირექციამ ხორცის სექციის საკუთარი ხარჯებით მოპირკეთება მოთხოვა.
ბონის საკოლმეურნეო ბაზრის მოვაჭრეებს მხოლოდ ერთი ონკანი აქვთ, რომელიც მათი აზრით, საკმარისი არ არის. მოვაჭრეთა ნაწილის თქმით, ონკანიდან წყალი ან საერთოდ არ მოდის, ან ცოტა მოდის. თანამშრომელთა ნაწილი აცხადებს, რომ ბაზარში ადრე 3 ონკანი იყო, რომელიც თავად მოვაჭრეებმა დააზიანეს.
ალექსანდრე აბაშიძის განცხადების საპირისპიროს ამტკიცებენ ბაზრის ექიმები. მათი თქმით, ცხენის ხორცი, რომელიც სავაჭრო ობიექტში მალულად იყო შეტანილი, ობიექტიდან რამდენჯერმე ამოიღეს და ამის დამადასტურებლად ოქმებიც წარმოადგინეს.
სავაჭრო ობიექტში ექიმები ხორცს სპეციალური ცნობის გარეშე არ იღებენ. ბაზრის ლაბორატორიის ერთ-ერთმა ექიმმა ასევე დასძინა, რომ ცხენის ხორცის გაყიდვა კანონით აკრძალული არ არის.
"სავაჭრო ობიექტების მონიტორინგი სურსათის ეროვნული სააგენტოს აჭარის რეგიონულ სამმართველოს ევალება. სააგენტოს პრესსამსახურის განცხადებით, ცენტრალური ბაზრის ხელმძღვანელს პირველი რეიდის განხორციელების დროს შენიშვნები მისცეს, რომლის გამოსწორებისთვის მას გონივრული ვადა დაუწესეს. ვერიკო გულუას თქმით, ბაზარში სანიტარული ნორმების დაცვასა და პროდუქციის ვარგისიანობაზე პასუხისმგებელი ბაზრის დირექცია. დღეს ბაზრის დირექტორი სამსახურში არ იმყოფებოდა, თანამშრომელთა თქმით, იგი თბილისშია. ლევან ბაკურიძე ჩვენთან სატელეფონო საუბარში ამტკიცებს, რომ ბაზარში ცხენის ხორცი არ იყიდება და სანატირული ნორმები დაცულია. ბაკურიძე ხორცის სექციაში სხვადახვა ცხოველის ხორცის განმასხვავებელი აბრის გაკეთებას საჭიროდ არ მიიჩნევს, რადგან მისი თქმით, საქონლის და ღორის ხორცს მომხმარებელი თავად ასხვავებს", - აღნიშნავს ტელეკომპანია "TV-25".
