უკრაინამ და ევროკავშირმა გაწევრიანების მოლაპარაკებების ბოლო კლასტერის სკრინინგი დაასრულეს. უკრაინისა და ევროკავშირის წარმომადგენლებს შორის შეხვედრები მოლაპარაკებების ბოლო, მე-11 სექციის შესახებ - „სოფლის მეურნეობა და სოფლის განვითარება“ - დასრულდა.
ინფორმაციას უკრაინული მედია ქვეყნის ეკონომიკის, ეკოლოგიისა და სოფლის მეურნეობის სამინისტროზე დაყრდნობით ავრცელებს.
როგორც აღინიშნა, სამდღიანი სკრინინგ შეხვედრების განმავლობაში უკრაინამ წარმოადგინა 28 თემატური ბლოკი, რომლებიც, კერძოდ, ეხებოდა სოფლის მეურნეობის რეფორმების მდგომარეობას, დიგიტალიზაციის პროგრესს, სახელმწიფო მხარდაჭერას, ბაზრის რეგულირებას და სოფლის მეურნეობის სექტორის განვითარებას.
უკრაინის ეკონომიკის სამინისტრომ განაცხადა, რომ ამან „აჩვენა უკრაინის მზადყოფნა, ინტეგრირდეს ევროკავშირის საერთო სასოფლო-სამეურნეო პოლიტიკაში“.
უკრაინის დელეგაციამ ასევე წარმოადგინა უკრაინის კანონმდებლობის ევროკავშირის სამართლებრივ აქტებთან ჰარმონიზაციის დონე ხუთ სფეროში: „ჰორიზონტალური საკითხები - ფინანსური და ადმინისტრაციული სტრუქტურები“, „სასოფლო-სამეურნეო ბაზრები“, „ხარისხის პოლიტიკა“, „ორგანული წარმოება“ და „სასოფლო-სამეურნეო პროდუქციის პოპულარიზაცია“.
„ევროკომისიამ წარდგენილი მასალები დადებითად შეაფასა“, - ნათქვამია განცხადებაში.
