"დემოკრატიული მოძრაობის" ლიდერ ნინო ბურჯანაძის შეფასებით, მისი მეუღლის - ბადრი ბიწაძის საქმე "თეთრი ძაფებით კი არა, თეთრი თოკებითაა შეკერილი".
ბურჯანაძის აზრით, პროკურატურას ბიწაძის ბრალეულობის დამადასტურებელი მტკიცებულებები არ გააჩნია, რაზეც თუნდაც ის გარემოება მიუთითებს, რომ დღევანდელი დაკითხვისას მის მიმართ ბრალდების მხარეს არც ერთი შეკითხვა არ გასჩენია.
"სასამართლო უხერხულ მდგომარეობაშია, რადგან ბრალდებას დამადასტურებელი დოკუმენტი არა აქვს. 2 საათის განმავლობაში პროკურატურას არც ერთი შეკითხვა არ დაუსვამს, რაც ასევე ადასტურებს ჩემს მიერ ნათქვამის სიმართლეს. თეთრი ძაფებით კი არა, თეთრი თოკებით არის აღნიშნული საქმე შეკერილი. ვერც ერთ შემთხვევაში, ვერც ერთ ნორმალურ სასამართლოში, ეს საქმე ბოლომდე ვერ მივა", - განუცხადა ნინო ბურჯანაძემ ჟურნალისტებს დაკითხვის შემდეგ.
შეგახსენებთ, რომ "დემოკრატიული მოძრაობის" ლიდერი დღეს სასამართლომ ბადრი ბიწაძის საქმესთან დაკავშირებით დაკითხა. სასამართლო მას ორი საათის განმავლობაში უსმენდა, თუმცა მისთვის არც პროკურორსა და არც მოსამართლეს შეკითხვები არ დაუსვიათ.
