ევროპასთან ინტეგრაციის კომიტეტის სხდომაზე დეპუტატებმა ევროკავშირთან სავაჭრო ხელშეკრულების გაფორმების თაობაზე იმსჯელეს. საუბარი, ძირითადად, სურსათის უვნებლობასთან დაკავშირებულ კანონმდებლობას შეეხო.
აღნიშნულ საკითხზე ინფორმაცია საქართველოს პრემიერ-მინისტრის მთავარმა ეკონომიკურმა მრჩეველმა თამარ კოვზირიძემ წარმოადგინა. მისი ინფორმაციით, ევროკავშირს მრავალ ათეულ ქვეყანასთან აქვს გაფორმებული სხვადასხვა სახის შეთანხმება, მაგრამ მასთან ფართო და ყოვლისმომცველი ხელშეკრულების დადება ურთიერთობის ახალი ტენდენციაა. აღსანიშნავია, რომ ამ მიმართულებით ევროკავშირი ინტენსიურ კონსულტაციებს უკრაინის შემდეგ, საქართველოსთან აწარმოაბს. ამ ეტაპზე მოლაპარაკების დაწყებისათვის საფუძველის მომზადება ხდება და ამჟამად მხარეები ტექნიკური შეთანხმების ფაზაში იმყოფებიან, აღნიშნა მომხსენებელმა.
"ევროკავშირთან ინტენსიური კონსულტაციები გვაქვს და მათ რეკომენდაციებს დეტალურად ვსწავლობთ. ერთის მხრივ ვცდილობთ, გავითვალისწინოთ ეს რეკომენდაციები, მაგრამ მეორეს მხრივ ასევე ვცდილობთ არ გავაკეთოთ არაფერი ისეთი, რაც რაიმე სახის ზიანს მოუტანს ჩვენს ქვეყანას, და მათ შორის კერძო სექტორს", - განაცხადა თამარ კოვზირიძემ.
მისი ინფორმაციით, რეკომენდაციები უკვე 2010 წლიდან ეტაპობრივად განხორციელდება, პირველი ნაბიჯი სურსათის მწარმოებელი საწარმოების რეგისტრაცია იქნება.
კომიტეტი ევროკავშირთან მიმდინარე მოლაპარაკებების თაობაზე ინფორმაციას რეგულარულად მიიღებს.
