ჩრდილოატლანტიკური ალიანისის წევრმა სახელმწიფოებმა კიდევ ერთხელ დაადასტურეს აფხაზეთისა და ე.წ. სამხრეთ ოსეთის არაღიარების პოლიტიკა და კიდეც ერთხელ მოუწოდეს რუსეთს შეცვალოს საკუთარი გადაწყვეტილება ამ კუთხით. აღნიშნულის შესახებ საუბარია პრეს-რელიზში, რომელიც ალიანსის ვებ-გვერდზე საქართველო-ნატოს კომისიის სხდომის შემდეგ გამოქვეყნდა.
"ნატოს მინისტრებმა კვლავ გამოხატეს ძლიერი მხარდაჭერა საქართველოს დამოუკიდებლობის, სუვერენიტეტისა და ტერიტორიული მთლიანობისადმი", - ნათქვამია გამოქვეყნებულ დოკუმენტში.
ამასთან საქართველო-ნატოს კომისიის წევრებმა მოუწოდეს რუსეთს შეასრულოს ცეცხლის შეწყვეტის შეთანხმებით გათვალისწინებული პირობები.
მინისტრებმა შეშფოთებას გამოთქვამენ ადმინისტრაციულ საზღვართან საქართველოს მოქალაქეების, მათ შორის არასრულწლოვნების დაკავების გამო.
გავრცელებული დოკუმენტის მიხედვით, ჩრდილოატლანტიკური ალიანისის წევრი სახელმწიფოების საგარეო საქმეთა მინისტრებმა მადლიერება გამოხატეს საქართველოს მიერ ავღანეთის სამხედრო ოპერაციაში მონაწილეობის გადაწყვეტილების გამო.
კომისიის სხდომაზე საუბარი შეეხო საქართველოში განხორციელებულ რეფორმებსაც, ნათქვამია გამოქვეყნებულ პრეს რელიზში.
