აშშ-ში აცხადებენ, რომ პირველად დაინახეს რუსეთის მხრიდან უკრაინაში ომის დასრულების რეალური სურვილის ნიშნები.
ამის შესახებ აშშ-ის ადმინისტრაციის ერთ-ერთმა წარმომადგენელმა სამმხრივი მოლაპარაკებების დაწყებამდე განაცხადა. მის კომენტარს Reuters ავრცელებს,
ამერიკელი მაღალჩინოსნის განცხადებით, სამშაბათს, აბუ-დაბიში დაგეგმილ მოლაპარაკებებზე ერთ-ერთი მთავარი საკითხი უკრაინის უსაფრთხოების გარანტიები იქნება. მათ შორის განიხილება უკრაინისთვის ნატო-ს ხელშეკრულების მეხუთე მუხლის მსგავსი დაცვის მექანიზმის ამოქმედების შესაძლებლობა.
მისივე თქმით, ორივე მხარე დახურულ ფორმატში ტერიტორიულ საკითხზე გარკვეულ კომპრომისზე წასვლის მზადყოფნას ავლენს.
ამერიკელი მაღალჩინოსნის განმარტებით, ტერიტორიულ საკითხზე შეთანხმება, სავარაუდოდ, მოლაპარაკებების დასკვნით ეტაპზე მიიღწევა, მას შემდეგ, რაც მხარეები სხვა საკითხებზე, მათ შორის ომის შემდგომი უსაფრთხოების არქიტექტურაზე, შეთანხმდებიან.
ამერიკელი მაღალჩინოსნის ინფორმაციით, მოლაპარაკებების დასრულების შემდეგ აშშ-ის სპეციალური წარმომადგენლები, ჯარედ კუშნერი და სტივ უიტკოფი, შესაძლოა რუსეთში გაემგზავრონ და ვლადიმირ პუტინს შეხვდნენ.
მისივე თქმით, აშშ-ში მოლაპარაკებებთან დაკავშირებით ფრთხილი ოპტიმიზმი აქვთ და პროგრესის მიღწევის შესაძლებლობას ხედავენ.
„ეს პირველი შემთხვევაა, როდესაც რუსეთის მხრიდან კონფლიქტის დასრულების რეალური სურვილი არსებობს“, - განაცხადა ამერიკელმა მაღალჩინოსანმა.
