ბიზნესმენ თამაზ ელიზბარაშვილის ადვოკატის, ლექსო სვიმონიშვილის განცხადებით, ბიზნესმენის დაკავება მოხდა ადმინისტრაციული წესით და ახლა მთავარ სამმართველოში გადაჰყავთ.
მისივე თქმით, საგამოძიებო მოქმედებების დასრულებას მისივე დაცვის ქვეშ მყოფის თხოვნით არ დაესწრო და ბინა დატოვა.
მოხდა თამაზ ელიზბარაშვილის დაკავება, როგორც გამოიყვანეს ბატონი თამაზი, მეც დავტოვე ტერიტორია, ახლა ადვოკატი არ ესწრება. ჩხრეკა გაგრძელდა თუ არა, არ ვიცი. ბატონი თამაზის თხოვნა იყო, დაგვეტოვებინა მისი საცხოვრებელი სახლი. ბავშვების ოთახის ჩხრეკაც მოხდა, რამაც გამოიწვია მისი წყობიდან გამოსვლა, ბავშვის ოთახში ხდებოდა სათამაშოების და პირადი ნივთები ჩხრეკა. გამოძიება დაწყებულია 151 მუხლით, რაც არის ნაკლებად მძიმე დანაშაული და ჩემს პრაქტიკაში არ არსებობს, რომ მსგავს დანაშაულზე ამხელა პოლიციის მობილიზება მომხდარიყო, - ამბობს ადვოკატი.
ცოტა ხნის წინ თამაზ ელიზბარაშვილი დააკავეს.
მანამდე, მისი ბინის ჩხრეკის ოპერაცია მიმდინარეობდა. როგორც ცნობილია, სამართალდამცველები იარაღს ეძებდნენ. ამავე მიზეზით გაჩხრიკეს მისი ავტომობილიც.
გამოძიება თამაზ ელიზბარაშვილის წინააღმდეგ სსკ-ის 151-ე - მუქარისა და 236-ე - ცეცხლსასროლი იარაღის მართლსაწინააღმდეგოდ შეძენა, შენახვა, ტარების მუხლებით მიმდინარეობს.
