უკრაინის ენერგეტიკის მინისტრმა დენის შმიჰალმა განაცხადა, რომ ოკუპანტების ახალი სამიზნე უკრაინის წყალმომარაგების სისტემების მიზანმიმართული განადგურებაა. ამის შესახებ მან Politico-სთან ინტერვიუში ისაუბრა.
„ახლა რუსეთის მიზანია ჩვენი წყალმომარაგების სისტემების განადგურება. გასულ ზამთარს ისინი ელექტროენერგიის მიწოდებასა და გათბობის ინფრასტრუქტურაზე იყვნენ ორიენტირებული, თუმცა ელექტროენერგიის გათიშვის დროს გადარჩენა მაინც შეიძლებოდა, თუ ადამიანს ჰქონდა გაზი და წყალი. წყლისა და კანალიზაციის გარეშე სამ დღეზე მეტხანს გაძლება რთულია.
პუტინს სურს, საბოლოოდ გაანადგუროს ჩვენი ენერგეტიკული სისტემა, შეარყიოს ეკონომიკა და შეაფერხოს იარაღის წარმოება. მას ასევე იმედი აქვს, რომ ზამთარში ჩვენი საზოგადოება გამოფიტვისგან გატყდება და ხელისუფლებაზე ზეწოლას მოახდენს, რათა კაპიტულაციას მოაწეროს ხელი“, - განაცხადა შმიჰალმა.
მისი თქმით, კიევი იმედოვნებს, რომ მისი დარტყმები, ისევე როგორც მოკავშირეების მიერ დაწესებული სანქციები, ზეწოლას მოახდენს ვლადიმირ პუტინზე, რომ ამ შემოდგომაზე ომი შეწყვიტოს. თუ ეს ვერ მოხერხდება, უკრაინას რუსეთის მხრიდან ენერგეტიკული ინფრასტრუქტურის წინააღმდეგ თავდასხმების კიდევ ერთი ზამთარი ელის.
მისი თქმით, უკრაინა რუსეთის აგრესიას პასუხობს რუსეთის ნავთობგადამამუშავებელ ქარხნებზე შორ მანძილზე დარტყმების კამპანიით.
შმიჰალის განცხადებით, შედეგად რუსეთის ნავთობგადამუშავების ძირითადი სიმძლავრეების დაახლოებით 40% მწყობრიდან არის გამოყვანილი, რამაც მთელ რუსეთში საწვავის დეფიციტი გამოიწვია.
დენის შმიჰალის განცხადებით, კიევი იმედოვნებს, რომ უკრაინის მიერ განხორციელებული დარტყმები და მოკავშირეების სანქციები ვლადიმირ პუტინს აიძულებს, ომი მიმდინარე წლის შემოდგომაზე შეწყვიტოს.
მისი თქმით, თუ ეს ვერ მოხერხდება, უკრაინას გასული ზამთრის სცენარის განმეორება ემუქრება - ოკუპანტების მიერ ქვეყნის ენერგეტიკულ ინფრასტრუქტურაზე მუდმივი თავდასხმებით.
მისი განცხადებით, უკრაინა ელექტროენერგიის, წყლისა და გაზის შესანახი ობიექტებისთვის დამცავ ნაგებობებს აშენებს, რათა ისინი რუსეთის თავდასხმებისგან დაიცვას.
გარდა ამისა, ქვეყანაში მონტაჟდება მოდულური ქვაბები და ელექტროგენერატორები, რომლებიც ტრადიციულ ელექტროსადგურებთან შედარებით უფრო მცირე ზომისაა და უფრო ფართოდ არის განთავსებული. ეს კი, უკრაინის ხელისუფლების შეფასებით, მოწინააღმდეგისთვის მათ განადგურებას ართულებს.
თუმცა, უკრაინის ენერგეტიკული მდგრადობის გასაძლიერებლად დასავლელი პარტნიორების ფინანსური მხარდაჭერაა საჭირო, განაცხადა დენის შმიჰალმა.
მისი თქმით, ზამთრამდე უკრაინას დაახლოებით 500 მილიონი ევრო სჭირდება.
შმიჰალის განცხადებით, კიევს ასევე დაახლოებით 400 მილიონი ევრო ესაჭიროება, რათა სახელმწიფო კომპანია "ნაფტოგაზი" რუსეთის თავდასხმების შემდეგ აღადგინონ. უკრაინა იმედოვნებს, რომ ამ მიმართულებით მხარდაჭერას კანადა გაუწევს.
ამასთან, მინისტრი დარწმუნებულია, რომ უკრაინა მომავალ ზამთარს გაუძლებს, რადგან მისთვის მოსამზადებელი სამუშაოები უკვე მიმდინარეობს.
შმიჰალის თქმით, სასურველი სცენარი ის არის, რომ პუტინი მიხვდეს, ომს ვერ მოიგებს და მიმდინარე წლის შემოდგომაზე სამშვიდობო შეთანხმებას დათანხმდეს. თუმცა, კრემლის ლიდერს უკრაინასთან დაკავშირებით საკუთარი მოთხოვნების შეცვლის არანაირი ნიშანი არ გამოუჩენია, რაც, სავარაუდოდ, კიდევ ერთ ზამთარში გაგრძელებულ ომს ნიშნავს.
„ის სისხლისღვრას გააგრძელებს, თუმცა ზამთარშიც შეგვითრევს. ეს პესიმისტური სცენარია, მაგრამ მე ოპტიმისტურად ვარ განწყობილი, რომ ამ ზამთარსაც გადავიტანთ - ამისთვის მზად ვართ“, - აღნიშნა შმიგალმა.
