ოთხი წლის განმავლობაში კრემლი დარწმუნებული იყო, რომ გამოფიტვის ომში უკრაინაზე მეტხანს გაძლებდა. თუმცა ახლა, როდესაც უკრაინული დრონები რუსეთის არმიასა და ნავთობის ინდუსტრიას სულ უფრო დიდ ზიანს აყენებენ, მოსკოვში აცნობიერებენ, რომ დრო უკვე მათ წინააღმდეგ მუშაობს.

ამის შესახებ The Wall Street Journal წერს.

გამოცემის შეფასებით, რუსეთის არმია ფრონტზე სულ უფრო მცირე წინსვლას აღწევს, დანაკარგები ახალწვეულთა რაოდენობას აღემატება, ხოლო სამხედროები უკრაინული დრონების შეტევებთან ადაპტაციას სულ უფრო რთულად ახერხებენ.

ამასთან, უკრაინული არმია დანებებას არც კი განიხილავს, როგორც ამას მოსკოვი ელოდა. მეტიც, ცალკეულ მონაკვეთებზე უკრაინელი სამხედროები ოკუპანტების უკან დახევასაც ახერხებენ.

„უკრაინა თანდათანობით იბრუნებს ინიციატივას და რუსეთს იმ მიმართულებებზე უქმნის პრობლემებს, სადაც ის ყველაზე სუსტია“, - განაცხადა პოლონური სამხედრო-ანალიტიკური კომპანიის დამფუძნებელმა, კონრად მუზიკამ.

The Wall Street Journal-ის შეფასებით, ომი გარდამტეხ ეტაპზეა, თუმცა ჯერჯერობით გაურკვეველია, რომელი მიმართულებით განვითარდება მოვლენები.  ჟურნალისტები აღნიშნავენ, რომ ეს ცვლილებები უკვე აისახა იმაზე, თუ როგორ აღიქმება ომი მოსკოვში, კიევსა და ვაშინგტონში.

WSJ ასევე წერს, რომ აშშ-ის პრეზიდენტმა დონალდ ტრამპმა ნატო-ს ანკარის სამიტზე უკრაინის პრეზიდენტ ვოლოდიმირ ზელენსკისთან მეგობრული შეხვედრის დროს მაღალი შეფასება მისცა უკრაინის მიღწევებსა და შესაძლებლობებს უპილოტო ტექნოლოგიების სფეროში.

ორი ამერიკელი მაღალჩინოსნის განცხადებით, პრეზიდენტ დონალდ ტრამპს რეგულარულად აწვდიან აშშ-ის დაზვერვის ანგარიშებს უკრაინის ახალი შეტევითი შესაძლებლობების შესახებ და ის ამ შესაძლებლობებით შთაბეჭდილების ქვეშაა.

მათივე თქმით, სწორედ ეს შეფასებები ხსნის, რატომ საუბრობს თეთრი სახლის ლიდერი უკრაინაზე ახლა გაცილებით უფრო დადებითად, ვიდრე გასულ წელს.

რუსმა სამხედრო ანალიტიკოსებმა აღიარეს, რომ ქვეყანა ისეთი გამოწვევების წინაშე აღმოჩნდა, რომელთა მასშტაბსაც 2022 წელს სრულმასშტაბიანი შეჭრის დაწყებისას არ ელოდნენ.

მათ შორის ანალიტიკოსები ასახელებენ შეტევის ტემპის შენელებას, უკრაინის კონტრშეტევების გააქტიურებასა და რუსეთის არმიაში გამოფიტვის აშკარა ნიშნებს.

ამავე დროს, უკრაინაში სულ უფრო მყარდება რწმენა, რომ ქვეყანა შეძლებს ომის გადატანას, დამოუკიდებლობის დაცვას და წინააღმდეგობის გაწევას რუსეთის პრეზიდენტ ვლადიმირ პუტინის მცდელობისთვის, დაიმორჩილოს უკრაინა.

„თუმცა ხანგრძლივი ბრძოლა ჯერ დასრულებული არ არის“, - წერს The Wall Street Journal.

The Wall Street Journal-ის შეფასებით, მთავარი კითხვა ისაა, როდის მივა რუსეთის პრეზიდენტი ვლადიმირ პუტინი იმ დასკვნამდე, რომ ომი მისთვის სულ უფრო ნაკლებ სარგებელს და უფრო მეტ დანახარჯს იწვევს, და დათანხმდება უკრაინის მოთხოვნას ცეცხლის შეწყვეტის შესახებ, რაც ფრონტის ამჟამინდელი ხაზის გაყინვას ნიშნავს.

გამოცემა წერს, რომ ამერიკელი მაღალჩინოსნების ნაწილი იმედოვნებს, პუტინი ასეთ გადაწყვეტილებას წლის ბოლოსთვის მიიღებს, თუმცა სხვების შეფასებით, ამის პასუხი არის - „არასოდეს“.

„პუტინი მზად არის ხანგრძლივი გამოფიტვის ომისთვის... ეს ომი მისი ცხოვრების მთავარ საქმედ იქცა და ის მას სიცოცხლის ბოლომდე გააგრძელებს“, - განუცხადა გამოცემას მოსკოვის სტრატეგიებისა და ტექნოლოგიების ანალიზის ცენტრის დირექტორმა, რუსლან პუხოვმა.