მინისტერიალიდან საქართველოსთან დაკავშირებით განსაკუთრებულს არაფერს ველოდებით. ცალკეულ უცხოელ პირებს ვურჩევ, ქართველი ხალხის სახელით საუბარს თავი დაანებონ, – ამის შესახებ პარლამენტის ევროინტეგრაციის კომიტეტის თავმჯდომარემ, ლევან მახაშვილმა განაცხადა და ლუქსემბურგში, ევროკავშირის საგარეო საქმეთა მინისტრების საბჭოს შეხვედრამდე საქართველოსთან დაკავშირებით გაკეთებულ განცხადებებს გამოეხმაურა.
მისივე თქმით, ლუქსემბურგში მიმდინარე მინისტერიალს გულისყურით დააკვირდება.
„მნიშვნელოვანია, რა გადაწყვეტილებებს იღებს ხოლმე ევროკავშირი, რადგან მას აქვს გეოპოლიტიკური შედეგები, მათ შორის საქართველოსთვისაც. საქართველოსთან დაკავშირებით განსაკუთრებულს არაფერ ველოდებით, გარდა იმისა, რაც წინა წლებში გვინახავს – ტრადიციულად, კრიტიკული და რეალობიდან მოწყვეტილი განცხადებები. ალბათ საბჭოს შეხვედრაც ასე დასრულდება. რაც შეეხება ცალკეული პირების მხრიდან საქართველოსადმი გაკეთებულ განცხადებებს, ყველას ვურჩევ, ქართველი ხალხის სახელით საუბარს თავი დაანებონ. რომელმა უცხოელმაც გადაწყვიტა, ქართველი ხალხის სახელით ესაუბრა, ზოგი პენსიაზე გავიდა და ზოგმა თავისი მანდატები დაკარგა ადგილობრივ არჩევნებზე. ეს, უპირველეს ყოვლისა, მეტყველებს, რომ ისინი არ დგანან სწორ მხარეს, საღად ვერ აფასებენ, ზოგადად, მიმდინარე მოვლენებს.
რაც შეეხება ფინეთის საგარეო საქმეთა მინისტრის განცხადებას, რა უნდა თქვას, არ ვიყავი გადაკეტილ რუსთაველზე, არ ვმონაწილეობდიო? რა მიზეზი უნდა დაასახელოს? რასაც ვაკვირდებით, ისაა, რომ ელინა ვალტონენი ევროპელ ჯო უილსონად ყალიბდება. ადამიანად, რომელიც, პირადი ინტერესების საფუძველზე, მზად არის, პოლიტიკურ მანიპულაციებად აქციოს ორმხრივი ურთიერთობები. ეს სამწუხარო რეალობაა, თორემ შეიძლება ვიღაცას გულწრფელად სჯეროდეს რაღაც, რასაც გავიგებთ, მივიღებთ და შეიძლება გავაკრიტიკებთ, მაგრამ გასაგები იქნება. ამ კონკრეტულ შემთხვევაში ყველაზე დასანანი ისაა, რომ ეუთო-ს ინსტიტუტებს ეფარება და განცხადებების გაკეთებას ამ სახელით ცდილობს. შეუძლებელია, სხვა განცდა დაგვრჩეს გარდა იმისა, რომ იგი ევროპელ ჯო უილსონად გადაქცევას ცდილობს“, – განაცხადა ლევან მახაშვილმა.
