პოლონეთში იპოვეს რუსული დრონების ნამსხვრევები, რომლებმაც, სავარაუდოდ, 10 სექტემბრის ღამეს ქვეყნის საჰაერო სივრცე მასობრივად დაარღვიეს. ინფორმაციას პოლონური მედია ავრცელებს.
თუ დადასტურდება, რომ ეს ერთ-ერთი რუსული დრონია, მათი რაოდენობა 19-ს მიაღწევს - ოფიციალურად სწორედ ამდენი დააფიქსირეს პოლონურმა სამსახურებმა.
პოლიციამ აღმოჩენის შესახებ შეტყობინება 20 სექტემბრის შუადღისას მიიღო. დრონი აღმოაჩინეს კეტრჟინის ოლქის სოფელ კორშეში, რომელიც რუსეთის კალინინგრადის ოლქს ესაზღვრება.
აპარატი ტერიტორიის მეპატრონემ საცხოვრებელი შენობიდან რამდენიმე ათეული მეტრის დაშორებით იპოვა. ადგილზე პოლიციისა და პროკურატურის წარმომადგენლები მივიდნენ.
პოლიციის წყაროების ცნობით, სავარაუდოდ, ეს ერთ-ერთი რუსული დრონია, რომელმაც პოლონეთის საჰაერო სივრცე დაარღვია.
